अब पोखराबाट पनि हरेक साता व्यवसायिक अन्तराष्ट्रिय उडान, हिमालय एयरलाइन्सले चैत १८ देखि पोखरा–ल्हासा उडान गर्दै

काठमाडौं(जस)–हिमालय एयरलाइन्सले आउँदो चैत १८ (मार्च ३१) देखि पोखराबाट उडान सुरू गर्ने भएको छ । पोखरा अन्तर्राष्ट्रिय विमानस्थलबाट हिमालयले नियमित व्यवसायिक उडान गर्ने भएको हो । एयरलाइन्सले काठमाडौं–ल्हासा–पोखरा–ल्हासा–काठमाडौं सातामा एउटा उडान गर्ने जनाइएको छ ।
यो विमानस्थल २०७९ पुसमा सञ्चालनमा आएको हो । अहिलेसम्म नियमित व्यवसायिक उडान हुन सकेको थिएन । हिमालयले व्यवसायिक उडान थालेसँगै यो नै पोखराबाट अन्तर्राष्ट्रिय उडान गर्ने पहिलो वायुसेवा बन्नेछ । नेपाल र चीनबीचको हवाई सम्बन्धलाई सुदृढ गर्ने लक्ष्यका साथ यो गन्तव्यमा व्यवसायिक उडान गर्न लागेको कम्पनीले प्रेस विज्ञप्तिमार्फत बताएको छ ।
अहिलेसम्मको योजना अनुसार एयरलाइन्सले चैत्र १८ गते बिहान ८ः३० बजे त्रिभुवन अन्तर्राष्ट्रिय विमानस्थलबाट काठमाडौं–ल्हासा उडान गर्नेछ । चीनको स्थानीय समयअनुसार १२ः०५ बजे ल्हासाको गोंगर विमानस्थलमा अवतरण हुनेछ। सोही जहाज स्थानीय समयअनुसार १२ः४५ मा पोखरा अन्तर्राष्ट्रिय विमानस्थलमा अवतरण हुनेछ ।
यसरी नयाँ सुरू हुन लागेको गन्तव्यलाई लिएर कम्पनी निकै खुसी रहेको उपाध्यक्ष विजय श्रेष्ठले बताएका छन् । ‘हिमालयको मुख्य उद्देश्य चीनका विभिन्न १० पर्यटकीय क्षेत्रमा उडान सञ्चालन गर्ने र १० लाख चीनियाँ पर्यटकलाई नेपालमा स्वागत गर्ने हो,’ उपाध्यक्ष श्रेष्ठले सुनाए, ‘हिमालयले सधैं चीनमा नयाँ गन्तव्य खोज्दै र नियमित उडान गर्दै आइरहेको छ ।’