काठमाडौं । युरोपका विभिन्न सहरहरुमा जारी १६औं संस्करणको युरोकप फुटबलअन्तर्गत आजदेखि सेमिफाइनलका खेलहरु हुँदैछन् ।
पहिलो सेमिफाइनलमा आज राति पौने १२ बजेदेखि इटाली र स्पेनबीच प्रतिस्पर्धा हुनेछ । त्यसैगरी दोस्रो सेमिफाइनल भने डेनमार्क र इंग्ल्यान्डबीच भोलि हुनेछ ।
इटालीले क्वाटरफाइनलमा बेल्जियमलाई हराएर सेमिफाइनलमा प्रवेश गरेको हो भने स्पेनले स्वीट्जरल्यान्डविरुद्ध टाइब्रेकरमा जीत निकाल्दै अन्तिम चारमा स्थान बनाएको हो ।
हालसम्म इटालीले एकपटक युरोकपको उपाधि जितेको छ भने स्पेन तीनपटकको उपाधि विजेता हो । इटालीको लय हेर्दा तीनपटकको विजेतालाई हराएर अघि बढ्दै दोस्रो उपाधि जित्ने लक्ष्यका साथ उत्रिनेछ ।
स्पेन पनि पछिल्ला खेलहरुमा उत्कृष्ट फर्ममा देखिएको छ । समूह चरणका सुरुवाती दुई खेलमा बराबरी गरेको स्पेनले त्यसपछिका दुई खेलमा १० गोल गरेको थियो । क्वाटरफाइनलमा स्वीट्जरल्यान्डसँगको खेल भने प्रतिस्पर्धात्मक भएको थियो ।
© 2026 All right reserved | Site By : sobij
