त्रिकोणीय सिरिजमा ओमानको लगातार दोस्रो जित

काठमाडौं(जस)–आइसीसी विश्वकप डिभिजन–२ अन्तर्गत काठमाडौँमा जारी त्रिकोणीय सिरिजमा ओमानले लगातार दोस्रो जित हासिल गरेको छ । ओमानले विहिबार अमेरिकालाई ६ विकेटले पराजित गर्दै लगातार दोस्रो जित हासिल गरेको हो । अमेरिकाले दिएको २१४ रनको लक्ष्य पछाएको ओमानले ४९.३ ओभरमा ४ विकेट गुमाउदै लक्ष्य पुरा गरेको थियो । ओमानको जितमा अकिब इयासले सर्वाधिक ७२ रन बनाएका थिए भने मोहमद नदीमले अविजित ५५ रन बनाए । त्यस्तै खवर अलीले ३२ तथा सुरज कुमारले अविजित ३३ रन बनाए ।
यस अघि टस हारेर पहिला ब्याटिंग गरेको अमेरिकाले ५० ओभरमा अलआउट हुदै २१३ रन बनाएको थियो । अमेरिकाका लागि सर्वाधिक रन इयान होल्याण्डले बनाए । उनी ६५ रन बनाएर आउट भए । त्यस्तै अक्षय होमराजले ४४ रनको योगदान दिए भने मोनाक पटेलले १९, टिमिल पटेलले १६, जेभियर मार्शलले १३ र एरोन जोन्सले १२ रन बनाएका थिए । पुछारका ब्याट्सम्यान सौरभ नेत्राभलकरले अविजित १४ रन बनाए भने रस्टि थेरोनले १० रन बनाए ।
ओमानका बलर मोहमद नाडीमले ३ विकेट लिए भने नीशाम मक्सुद, बिलाल खान र अकिब इयासले २–२ विकेट लिए । बुधबार देखि शुरु भएको सिरिजमा ओमानले पहिलो खेलमा नेपाललाई पराजित गरेको थियो । अब शनिबार नेपाल र अमेरिका बीच सिरिजको तेस्रो खेल हुने छ ।