इजरायलसँग नखेल्ने आयरल्यान्डको अनुरोध युइएफएद्वारा अस्वीकार

काठमाडौँ । इजरायलसँग नखेल्ने आयरल्यान्डको अनुरोध अस्वीकार गरेपछि युरोपेली फुटबलको नियामक निकायले आफ्नो नीतिको बचाउ गरेको छ।

भविष्यमा इजरायलसँगको खेल वा प्रतिस्पर्धाबाट बच्न गरिएको आफ्नो अनुरोध अस्वीकार गरिएको आयरल्यान्डको फुटबल संघले बताएपछि युइएफएले यस्तो प्रतिक्रिया दिएको हो।

रिपब्लिक अफ आयरल्यान्डको फुटबल संघले भविष्यमा इजरायलसँग खेल-जोडी नपर्ने गरी गरिएको आफ्नो अनुरोध अस्वीकार गरिएको बताए पछि युइएफएले प्रतियोगिताको ‘ड्र’ (खेल तालिका निर्धारण) गर्दा राष्ट्रिय टोलीहरूलाई अलग राख्ने वा नराख्ने निर्णय प्रत्येक घटनाको विशेष परिस्थिति र मुख्यतया सुरक्षासम्बन्धी मापदण्डका आधारमा गरिने जनाएको छ।

फुटबल एसोसिएसन अफ आयरल्यान्डका प्रमुख कार्यकारी डेभिड कौरेलले शुक्रबार बताएअनुसार, फेब्रुअरीमा भएको ‘नेसन्स लिग’ को ‘ड्र’ मा रिपब्लिक अफ आयरल्यान्ड र इजरायल एकै समूहमा परे पछि, संघले भविष्यका ‘ड्र’ हरूमा यी दुई टोलीलाई अलग राख्न सकिन्छ कि भनेर युइएफएसँग अनुरोध गरेको थियो। उनीहरूबीच उक्त प्रतियोगितामा सेप्टेम्बर २७ र अक्टोबर ४ मा खेल हुने तय छ।

युरोपेली फुटबलको नियामक निकायले टोलीहरूलाई एक-अर्काविरुद्ध खेल्न नपर्ने गरी ‘ड्र’ बनाउन गरिने अनुरोधहरूमाथि व्यक्तिगत रूपमा विचार गरिने जनाएको छ।

“केही टोलीहरूलाई एक-अर्काविरुद्ध खेल्न नपर्ने गरी व्यवस्था गर्ने निर्णयहरू विभिन्न पक्षलाई ध्यानमा राखेर गरिन्छ; विशेष गरी दुई देशबीचको अवस्थाले निम्त्याउने सुरक्षासम्बन्धी संरचनात्मक जोखिमलाई यसमा विचार गरिन्छ,” युइएफएले शनिबार जारी गरेको विज्ञप्तिमा भनेको छ, “युइएफएले हरेक परिस्थितिलाई त्यसको विशिष्टताका आधारमा निकै सावधानीपूर्वक सम्हाल्छ तथा सबै तथ्य र घटनाक्रमहरूको निगरानी गर्छ।”

कौरेलले पत्रकारहरूलाई बताएअनुसार, आयरल्यान्ड र इजरायलबीच “कहिल्यै पनि प्रत्यक्ष द्वन्द्व नभएको” हुनाले त्यस्तो व्यवस्था गर्न सम्भव नहुने जानकारी एफएआई लाई दिइएको थियो।

इजरायल फुटबल संघले पनि कौरेलको भनाइमा प्रतिक्रिया जनाउँदै युइएफएसँग औपचारिक अनुरोध गरिएको हो वा होइन भन्ने प्रश्न उठाएको छ।

“यो प्रश्न युइएफएसँग सोध्नुपर्छ: के यस विषयमा कुनै आधिकारिक सोधपुछ वा अनुरोध गरिएको थियो, वा यो केवल अर्को अर्थहीन भनाइ मात्र हो?” आईएफए (IFA) का सञ्चार प्रमुख श्लोमी बार्जलले रोयटर्स समाचार संस्थालाई भने, “वास्तविकतासँग कुनै सरोकार नराख्ने भनाइहरूलाई लिएर विचलित हुन हामीले धेरै अघि नै छोडिसकेका छौँ। त्यसैले अहिले हामी मैदानमा आफ्ना लक्ष्यहरू हासिल गर्न उच्चस्तरीय व्यावसायिक तयारीमा केन्द्रित छौँ।”

मध्यपूर्वको द्वन्द्वका बीच आयरल्यान्डका खेलहरू विवादित बनेका छन्। गत नोभेम्बरमा, एफएअाइका सदस्यहरूले युरोपेली प्रतियोगिताहरूबाट IFA लाई निलम्बन गर्न  युइएफएसँग अनुरोध गर्ने पक्षमा भारी बहुमतले मतदान गरेका थिए। साथै, मे महिनामा आयरल्यान्डको घरेलु ‘नेसन्स लिग’ खेल बहिष्कार गर्ने अभियानमा आयरल्यान्डका प्रमुख फुटबल खेलाडी तथा चर्चित व्यक्तिहरू समेत सहभागी भएका थिए।

आयरल्यान्डको घरेलु मैदानमा हुनुपर्ने अक्टोबर ४ को खेल डब्लिनको सट्टा सर्बियाको बाच्का तोपोलामा बन्द रंगशालाभित्र (दर्शकविहीन रूपमा) खेलिने भएको छ। अर्कोतर्फ, त्यसभन्दा अघिल्लो साता हंगेरीको डेब्रेसेनमा हुने इजरायलको घरेलु खेलका लागि भने आयरल्यान्डका समर्थकहरूले टिकट पाउने छैनन्।