मलेसिया रोजगारीमा ‘सिण्डिकेट’ को हल्लाप्रति श्रम मन्त्रालयको स्पष्टिकरण, “वैदेशिक रोजगारलाई स्वच्छ, पारदर्शी र प्रतिस्पर्धी बनाउन सरकार प्रतिबद्ध”

काठमाडौं । युवा, श्रम तथा रोजगार मन्त्रालयले मलेसियामा नेपाली श्रमिक पठाउने प्रक्रियामा मन्त्रालयकै संलग्नतामा सीमित वैदेशिक रोजगार व्यवसायी (म्यानपावर) लाई फाइदा पुग्ने गरी ‘सिण्डिकेट’ सञ्चालन गर्न लागिएको भन्ने समाचारप्रति गम्भीर ध्यानाकर्षण भएको जनाएको छ। पछिल्ला केही दिनयता विभिन्न सञ्चारमाध्यम तथा सामाजिक सञ्जालमा प्रकाशित र प्रसारित समाचारप्रति प्रतिक्रिया दिँदै मन्त्रालयले त्यस्ता दाबी तथ्यमा आधारित नभएको स्पष्ट पारेको हो।

सोमबार जारी गरिएको प्रेस विज्ञप्तिमा मन्त्रालयले नेपाली श्रमिकको हितलाई केन्द्रमा राखेर वैदेशिक रोजगार क्षेत्रलाई स्वच्छ, पारदर्शी, प्रतिस्पर्धी र श्रमिकमैत्री बनाउने नीतिमा सरकार दृढतापूर्वक अघि बढिरहेको उल्लेख गरेको छ। कुनै पनि व्यक्ति, संस्था वा सीमित व्यवसायीलाई विशेष लाभ पुग्ने गरी नीति निर्माण वा निर्णय गर्ने कार्य मन्त्रालयको नीति र उद्देश्य विपरीत रहेको विज्ञप्तिमा स्पष्ट गरिएको छ।

मन्त्रालयले वैदेशिक रोजगार क्षेत्रलाई अझ प्रभावकारी, विश्वसनीय र व्यवस्थित बनाउन हाल विद्यमान नीति, कानुन तथा कार्यप्रणालीमा आवश्यक सुधार गर्दै आएको जनाएको छ। सेवा प्रवाहलाई छिटो, सहज र पारदर्शी बनाउन सूचना प्रविधिको अधिकतम प्रयोग गर्दै प्रशासनिक सुधारका कार्यक्रमसमेत कार्यान्वयन भइरहेको मन्त्रालयको भनाइ छ। यस्ता सुधारका प्रयास भइरहेका बेला आधारहीन आरोप र अफवाह फैलाउनु उचित नहुने मन्त्रालयले जनाएको छ।

विज्ञप्तिअनुसार मलेसियामा नेपाली श्रमिक पठाउने प्रक्रियासम्बन्धी हाल सार्वजनिक गरिएका ‘सिण्डिकेट’ सम्बन्धी दाबी पुष्टि हुने कुनै आधिकारिक जानकारी मन्त्रालयलाई प्राप्त भएको छैन। सम्बन्धित गन्तव्य मुलुकबाट समेत यस विषयमा कुनै औपचारिक जानकारी नआएको उल्लेख गर्दै मन्त्रालयले अपुष्ट सूचनाका आधारमा भ्रम सिर्जना नगर्न सबै पक्षलाई आग्रह गरेको छ।

मन्त्रालयले नेपालबाट वैदेशिक रोजगारीमा जाने श्रमिकको सुरक्षा, अधिकार र सम्मान सुनिश्चित गर्न गन्तव्य मुलुकसँग निरन्तर कूटनीतिक संवाद तथा समन्वय भइरहेको जनाएको छ। साथै श्रमिकलाई सुरक्षित, मर्यादित र शोषणरहित वातावरणमा रोजगारी उपलब्ध गराउने उद्देश्यअनुसार आवश्यक सुधार र सहकार्यलाई प्राथमिकता दिइएको पनि उल्लेख गरिएको छ।

श्रम मन्त्रालयका अनुसार वैदेशिक रोजगार क्षेत्र कुनै सीमित समूहको स्वार्थअनुसार होइन, कानुनी व्यवस्था, प्रतिस्पर्धा र पारदर्शिताका आधारमा सञ्चालन हुनुपर्छ भन्ने सरकारको स्पष्ट धारणा रहेको छ। त्यसैले कुनै पनि प्रकारको एकाधिकार वा सिण्डिकेटलाई सरकारले प्रोत्साहन नगर्ने स्पष्ट सन्देश विज्ञप्तिमार्फत दिइएको छ।

मन्त्रालयले सञ्चारमाध्यम, वैदेशिक रोजगार व्यवसायी, सरोकारवाला निकाय तथा आम नागरिकलाई आधिकारिक स्रोतबाट प्राप्त सूचनामात्रै विश्वास गर्न आग्रह गर्दै अपुष्ट समाचार र अफवाहले वैदेशिक रोजगार क्षेत्रको विश्वसनीयतामा नकारात्मक असर पार्न सक्ने चेतावनी दिएको छ।

विज्ञप्तिको अन्त्यमा मन्त्रालयले वैदेशिक रोजगार क्षेत्रलाई थप व्यवस्थित, पारदर्शी, नैतिक र श्रमिकमैत्री बनाउन सरकार निरन्तर सक्रिय रहेको उल्लेख गर्दै यस अभियानमा सञ्चारमाध्यम, व्यवसायी, श्रमिक तथा सम्पूर्ण सरोकारवालाको रचनात्मक सहयोग र सहकार्य आवश्यक रहेको जनाएको छ। मन्त्रालयका अनुसार तथ्यमा आधारित सूचना र पारदर्शी अभ्यासमार्फत मात्रै वैदेशिक रोजगार क्षेत्रलाई अझ विश्वासिलो र व्यवस्थित बनाउन सकिने विश्वास व्यक्त गरिएको छ।