नेपाली कांग्रेसभित्रको आन्तरिक विवाद सतहमा, विश्वासको मतको सम्मुखमा बानियाँ सकसमा

काठमाडौँ (जस)–बागमती प्रदेशमा नवनियुक्त मुख्यमन्त्री इन्द्रबहादुर बानियाँले मंगलबार विश्वासको मत लिने तयारी गर्दै गर्दा नेपाली कांग्रेसभित्रको आन्तरिक विवाद सतहमा आएको छ । पूर्वमुख्यमन्त्री तथा कांग्रेस संसदीय दलका १४ सांसदको नेतृत्व गरिरहेका बहादुर सिंह लामा आफ्नो पक्षका तीन सांसदलाई मन्त्री बनाउने पूर्वसहमति कार्यान्वयन गर्नुपर्ने अडानमा अडिग रहँदा बानियाँ दबाबमा परेका छन् । लामाले गोविन्द लम्साल, गीता गुरुङ र माया श्रेष्ठलाई मन्त्री नियुक्त गर्नुपर्ने माग अघि सारेका छन् । सहमति कार्यान्वयन नभए विश्वासको मत नदिने मात्र नभई सामूहिक राजीनामासम्मको तयारी रहेको उनको पक्षको भनाइ छ । साउन २० देखि काठमाडौँमा बसेका लामा शीर्ष नेताहरूसँग निरन्तर भेटघाट गर्दै आफ्नो अडानमा अडिग छन् ।
लामाले भने, ‘हामी छलफलमा छौँ । मुख्यमन्त्रीले हामीलाई समेट्न सक्नु भएको छैन । हामी सहमति अनुसार अघि बढ्नुपर्छ भन्ने मागमा छौँ । उहाँहरूले समेट्न खोज्नु भएको छैन ।’ उनले अन्तिम विकल्पको रूपमा सामूहिक राजीनामा दिने प्रस्तावसमेत आएको बताए । प्रदेशको ११० सदस्यीय सभामा सरकार जोगाउन कम्तीमा ५६ मत आवश्यक पर्छ । एमालेका २७ मत पक्का भए पनि कांग्रेसभित्रका ३७ मध्ये लामाको पक्षमा रहेका १४ सांसदले समर्थन नदिए बानियाँको सरकार ढल्ने जोखिम उच्च छ । मुख्यमन्त्री बानियाँ संसदीय दलबाट ह्वीप जारी गरेर विश्वासको मत लिने तयारीमा छन्, तर फ्लो क्रसको चुनौती कायमै छ ।
सांसद उत्तम जोशीले सहमति कार्यान्वयनका लागि अन्य विकल्पमा छलफल गर्नुपर्ने बताउँदै भने, ’कुनै व्यक्ति केन्द्रित भएर नागरिकको मतको अवमूल्यन गर्न हुँदैन । राजीनामाको कुरा अन्तिम विकल्प हो, पार्टीको निर्देशन पालना गर्नुपर्छ ।’ त्यस्तै, सांसद तीर्थ लामाले सरकार पार्टी नेतृत्वभन्दा बाहिर जानु हुँदैन भन्नेमा सबै एकमत एकमत रहेको दाबी गरे । मुख्यमन्त्री बानियाँ साउन २० मा कांग्रेस–एमालेका ६४ सांसदको समर्थनमा निर्वाचित भएका थिए । उनले विश्वासको मत लिएपछि मात्र मन्त्रिपरिषद् पूर्ण गर्ने रणनीति बनाएका छन् । तर पार्टीभित्रको शक्ति सन्तुलन मिलाउन चुनौतीपूर्ण बनेको छ ।
प्रदेशमा कांग्रेसको कोटामा अझै पाँच मन्त्रालय रिक्त छन् । एमालेसँगको भागबण्डा अनुसार कांग्रेसलाई मुख्यमन्त्रीसहित आठ मन्त्रालय पाउने सहमति छ । गत साउन २० मै कांग्रेसबाट दुई मन्त्री नियुक्त भए पनि बाँकी पाँच मन्त्रालयका लागि तीव्र प्रतिस्पर्धा चलिरहेको छ । शक्तिकेन्द्रअनुसार मन्त्रालयको दाबी तीव्र छ । सभापति शेरबहादुर देउवाको कोटाबाट शिवराज अधिकारी पहिले नै मन्त्री भइसकेका छन् । बानियाँको निकट मानिएका प्रभात लामा अर्थ मन्त्रालयमा पुग्ने चर्चा छ । गगनकुमार थापा समूहबाट सुरेश श्रेष्ठ मन्त्री बन्ने तयारीमा छन् भने महिला तर्फ याङ्कीला शेर्पाको नाम पनि छ । प्रकाशमान सिंह समूहबाट प्रमुख सचेतक कन्चनचन्द्र बादे सक्रिय छन् । महिला तथा दलित कोटामा मीनबहादुर विश्वकर्मा समूहकी सुना परियार अगाडि छन् ।
शेखर कोइराला समूहबाट रमेशकुमार महत मन्त्री बन्ने दौडमा छन् भने बहादुर सिंह लामा समूहले आफ्नो सूचीमा गोविन्द लम्साल, गीता गुरुङ र माया श्रेष्ठको नाम राखेको छ । कांग्रेसमा मन्त्री दोहोरिने परम्परा नरहेको भए पनि लामाले पुराना नाममै अडान लिएका छन् । यसबीच, कांग्रेसका धेरै सांसद काठमाडौँमै बसेर शीर्ष नेतासँग निरन्तर भेटघाटमा छन् । मुख्यमन्त्री बानियाँले पनि साउन २१ गतेदेखि राजधानीमै बसेर शक्ति सन्तुलनका लागि लबिङ गर्दै आएका छन् । विश्वासको मतको दिन नजिकिँदै जाँदा आफ्नै दलभित्रको असन्तुष्टि चिर्न नसके बानियाँको राजनीतिक भविष्य अनिश्चित बन्ने देखिएको छ । बानियाँ लामालाई संसदीय दलको नेताबाट हटाएर मुख्यमन्त्री बनेका थिए । यससँगै लामा बानियाँसँग चिढिएका छन् ।