सिमाक्षेत्रको कारोबार सक्रिय पार्न व्यापारीहरुको जमघट

आलोक यादव
लहान, १७ भदौ– नेपाल भारत सिमाक्षेत्रमा बढ्दो तस्करीलाई नियन्त्रण गर्न प्रहरी सक्रिय भएपछि तस्करहरुलाई छटपट्हाट हुन थालेको छ । तेस्रो मुलुकको मालसमान नेपालबाट भारत र भारतबाट भन्सार छली गरी विभिन्न उत्पादन नेपाल भित्रिदै आएको थियो ।
नेपालबाट तेस्रो मुलुकको मरिच, स्याउ, मटर, लहसुन र भारतीय कम्पनीकै नेपालमा उत्पादन हुने फेयर एण्ड लव्ली अवैद्य रुपमा भारत निर्यात गर्दै आएका थिए । यो सँगै विहारमा प्रतिबन्ध रहेको रक्सी नेपालबाट पठाउँने गरेको थियो ।
भारतबाट कपडा, इलेक्ट्रोनिक्स समान, किराना समानलगायत विभिन्न उत्पादन भन्सार छली गरी नेपाल भित्रियाउँदै आएको थियो ।
करिब चार महिनादेखि सिराहाका पत्रकारहरुले ‘मिशन बोर्डर’ लेख्दै आएपछि प्रहरीको निगरानी कडा हुन थालेको छ । प्रहरीको सक्रियता यसअघि पनि कसिलो नै रहेको दावी छ ।

प्रहरीको निगरानी बढेपछि हालसम्म करोडौको अवैध मालसमान बरामद गरी भन्सारमा बुझाएको छ । हालै आएका सिराहाका एसपी उमाप्रसाद चतुर्वेदीले सिमाक्षेत्रमा झन कडा गर्न थालेपछि लहानका एक नामुद व्यापारी प्रदेश २ का प्रहरीमा गुहार गरेको खुलासा भएको छ । प्रदेश २ का उच्च प्रहरीले समेत यस्ता कारोबारमा सहयोग नगर्ने भएको जानकारीमा आएको छ । सिमाक्षेत्रमा प्रहरीले कडाई बढाएपछि भदौ १४ गते सिरहाभरीका नामुद व्यापारी र हुलाकीमार्गमा पर्ने पालिका जनप्रतिनिधिहरुको भेला लहानमा गरेको छ । गोधुली होटलमा गरिएको सो भेलाको आयोजना जिल्ला उद्योग वाणिज्य सँघ लहानले गरिदिएको जानकारीमा आएको छ । सिमाक्षेत्रमा कारोबार गर्ने व्यापारीहरुले सो भेलामा दशैं तिहारसम्मको लागि खुला गरिदिन प्रहरीलाई दवाव दिने छलफल गरेको छ । समाजिक सँजालमा सो बैठकको फोटो राख्दै एक व्यापारीले सिराहाको दक्षिण सिमा क्षेत्रका व्यावसायीले भोग्नु परेको समस्यावारे प्रदेश साँसद, पालिका प्रमुख, स्थानीय सँघसँस्था र व्यावसायीहरुसँग छलफल गरेकाे उल्लेख गरेको छ ।