एनआरएनएका पदाधिकारीलाई क्षमता अभिवृद्धि तालिम

काठमाडौं(जस)–गैरआवासीय नेपाली संघ (एनआरएनए) का राष्ट्रिय समन्वय परिषद् (एनसीसी) का पदाधिकारीहरूको नेतृत्व तथा संस्थागत क्षमता अभिवृद्धि गर्ने उद्देश्यले तीनदिने रणनीतिक कार्यशाला सुरु भएको छ । अन्तर्राष्ट्रिय श्रम संगठन (आईएलओ), एनआरएनए र स्विस सरकारको सहकार्यमाकार्यशाला आयोजना गरिएको हो । बुधबारदेखि अक्टोबर ३० सम्म सञ्चालन हुने कार्यशालामा संघका विभिन्न राष्ट्रिय समन्वय परिषद्का पदाधिकारी तथा सचिवालयका कर्मचारी सहभागी छन् ।
कार्यशालामा एनआरएनएका अन्तर्राष्ट्रिय समन्वय परिषद् (आईसीसी) का उपाध्यक्ष रोजिना प्रधान राई, कोषाध्यक्ष कृष्ण तिमल्सिना, सचिव दीपेश खत्री, युरोप क्षेत्रीय महिला उपसंयोजक किरण सिग्देल र राधा तथा एनसीसी यूकेका अध्यक्ष राजेन्द्र पुडासैनीलगायत सहभागी छन् । कार्यशालाको मुख्य उद्देश्य सहभागीहरूको नेतृत्व क्षमता, रणनीतिक योजना निर्माण, संस्थागत व्यवस्थापन र कार्यसम्पादन क्षमता अभिवृद्धि गर्नु रहेको छ । यसका माध्यमबाट पदाधिकारीलाई संस्थाको उद्देश्यअनुरूप प्रभावकारी योजना बनाउन, कार्यान्वयन गर्न र संस्थागत जिम्मेवारी पूरा गर्न आवश्यक ज्ञान तथा सीप प्रदान गरिनेछ ।
कार्यशालामा संस्थाको दीर्घकालीन लक्ष्यअनुसार योजना निर्माण, उपलब्ध स्रोतसाधनको प्रभावकारी परिचालन र संस्थागत जिम्मेवारी निर्वाहलाई थप व्यवस्थित बनाउने विषयमा केन्द्रित रहने अपेक्षा गरिएको छ । राष्ट्रिय समन्वय परिषद्हरूको कामलाई प्रभावकारी बनाउन पदाधिकारीबीच साझा बुझाइ विकास गर्नु पनि यसको उद्देश्य हो ।
एनआरएनएका राष्ट्रिय समन्वय परिषद्हरूले सम्बन्धित देशमा रहेका नेपाली समुदायका आवश्यकता पहिचान गर्ने, उनीहरूका हितमा कार्यक्रम सञ्चालन गर्ने तथा संघका उद्देश्य कार्यान्वयन गर्ने जिम्मेवारी निर्वाह गर्दै आएका छन् । त्यसका लागि पदाधिकारीको नेतृत्व क्षमता र संस्थागत व्यवस्थापनमा सुधार आवश्यक हुने भएकाले कार्यशालालाई महत्त्वपूर्ण रूपमा हेरिएको छ । कार्यशालाले राष्ट्रिय समन्वय परिषद् र संघको सचिवालयबीच समन्वय सुदृढ गर्न, संस्थागत कार्यसम्पादनमा एकरूपता ल्याउन तथा कार्यक्रम कार्यान्वयनलाई प्रभावकारी बनाउन सहयोग पु¥याउने अपेक्षा गरिएको छ ।
आईएलओ, एनआरएनए र स्विस सरकारको सहकार्यमा सञ्चालित परियोजनाअन्तर्गतको यस कार्यक्रमले राष्ट्रिय समन्वय परिषद्का पदाधिकारीलाई संस्थागत जिम्मेवारी थप व्यवस्थित र प्रभावकारी रूपमा निर्वाह गर्न सहयोग गर्ने आयोजकको अपेक्षा छ । तीन दिनसम्म सञ्चालन हुने कार्यशालाबाट प्राप्त ज्ञान र सीपलाई व्यवहारमा उतार्दै राष्ट्रिय समन्वय परिषद्हरूको कार्यक्षमता सुधार गर्ने तथा संघका कार्यक्रमलाई थप प्रभावकारी बनाउने लक्ष्य राखिएको छ ।