स्वदेश फर्किँदा बिचौलियाको प्रलोभनमा नपर्न नेपाली दूतावासको आग्रह

काठमाडौं(जस)–मलेसियामा अवैधानिक हैसियतमा रहेका नेपाली श्रमिकलाई स्वदेश फर्किने क्रममा ट्राभल डकुमेन्ट बनाउन र अध्यागमनमा जरिवाना तिर्न बिचौलिया वा एजेन्टको प्रयोग नगर्न नेपाली राजदूतावास क्वालालम्पुरले आग्रह गरेको छ । स्वदेश फर्किने प्रक्रियामा सहजीकरण गरिदिने भन्दै केही बिचौलियाले रकम असुल्ने गरेको गुनासो आउन थालेपछि दूतावासले श्रमिकलाई सम्भावित ठगीबाट जोगिन सचेत गराएको हो ।
दूतावासले अवैधानिक हैसियतमा रहेका नेपाली श्रमिकलाई स्वदेश फर्किन आवश्यक प्रक्रियाबारे प्रत्यक्ष रूपमा आधिकारिक निकायबाट जानकारी लिन आग्रह गरेको छ । ट्राभल डकुमेन्ट बनाउन तथा मलेसियाको अध्यागमन विभागमा आवश्यक जरिवाना तिर्न एजेन्ट अनिवार्य नरहेको दूतावासले जनाएको छ । मलेसिया सरकारले अवैधानिक हैसियतमा रहेका विदेशी कामदारलाई स्वदेश फिर्ता कार्यक्रम सञ्चालन गरिरहेका बेला बिचौलियामार्फत ठगी हुन सक्ने र तेहि सम्बन्धि केहि गुनासा आएपछि दूतावासले श्रमिकलाई विशेष सावधानी अपनाउन अनुरोध गरेको हो ।
नेपाली श्रमिकलाई विभिन्न विषयमा आवश्यक सूचना तथा जानकारी उपलब्ध गराउने उद्देश्यले नेपाली राजदूतावास क्वालालम्पुरले हरेक शुक्रबार डेढ घण्टाको फेसबुक लाइभ कार्यक्रम सञ्चालन गर्दै फेसबुक लाइभमार्फत सुचना प्रबाह गर्दै आएको छ । कार्यक्रममार्फत श्रमिकका समस्या र गुनासा प्रत्यक्ष रूपमा सुन्ने, आवश्यक जानकारी दिने तथा सम्भव भएसम्म सम्बन्धित निकायसँग समन्वय गरी समाधानको पहल गर्ने गरिएको दूतावासले जनाएको छ । दूतावासले स्वदेश फर्किने प्रक्रियामा अन्योल भएमा अनधिकृत व्यक्ति वा एजेन्टको भर नपरी दूतावासबाटै आधिकारिक जानकारी लिन र अनावश्यक रकम नबुझाउन नेपाली श्रमिकलाई आग्रह गरेको छ ।