महिला फुटबलमा नयाँ पहल : पेसएक्स स्पोर्ट्सको इन्डोर टुर्नामेन्ट आजदेखि सुरु, १५ टोली उपाधिको दौडमा

काठमाडौं । नेपाली महिला फुटबलमा नियमित प्रतिस्पर्धा र प्रतिभा पहिचानका लागि नयाँ प्लेटफर्म थपिएको छ। पेसएक्स स्पोर्ट्सको आयोजनामा ‘महिला इन्डोर फुटबल टुर्नामेन्ट २०२६’ आजदेखि काठमाडौंमा सुरु हुँदैछ।

महिला खेलाडीलाई प्रतिस्पर्धात्मक अनुभव प्रदान गर्नुका साथै नयाँ प्रतिभाको पहिचान, विकास र उच्चस्तरीय खेल यात्राका लागि अवसर सिर्जना गर्ने उद्देश्यले प्रतियोगिता आयोजना गरिएको हो।

प्रतियोगितामा १५ टोली सहभागी छन्। टोलीहरूलाई चार समूहमा विभाजन गरिएको छ। समूह ‘ए’ मा तीन तथा समूह ‘बी’, ‘सी’ र ‘डी’ मा चार–चार टोली रहेका छन्।

Students FC र Geckoz बीच उद्घाटन भिडन्त

प्रतियोगिताको उद्घाटन खेल आज बिहान ९ बजे समूह ‘डी’ का Students Football Club र Geckoz बीच हुनेछ। उद्घाटन खेलसँगै दिनभर समूह चरणका प्रतिस्पर्धा सञ्चालन हुनेछन्।

प्रतियोगिताका सम्पूर्ण खेल आर स्क्वायर गेमस्टेशन (R Squared Gamestation) मा हुनेछन्। समूह चरणका खेल आजै सम्पन्न भएपछि भोलि सेप्टेम्बर २० मा क्वार्टरफाइनल, सेमिफाइनल र फाइनल खेल सञ्चालन हुने आयोजकले जनाएको छ।

समूह चरणमा GREVIX ACADEMY, Pace X Sports, Yakthung FC, KRIJAL FC लगायतका टोलीले प्रतिस्पर्धा गर्दैछन्। इन्डोर फर्म्याटमा हुने खेल छोटो, तीव्र र प्रतिस्पर्धात्मक हुने अपेक्षा गरिएको छ।

१ लाखभन्दा बढी पुरस्कार

प्रतियोगिताको कुल पुरस्कार राशि रु. १ लाख ५ हजार ९६५ रहेको छ। सहभागी टोलीहरू उपाधिका लागि प्रतिस्पर्धा गर्नेछन्।

आयोजकका अनुसार प्रतियोगिताको उद्देश्य पुरस्कारमा मात्र सीमित नभई महिला खेलाडीलाई नियमित प्रतिस्पर्धाको वातावरण उपलब्ध गराउनु र उनीहरूको क्षमता प्रदर्शन गर्ने अवसर सिर्जना गर्नु हो।

पुरुष फुटबलबाट महिला इन्डोरसम्म

पेसएक्स स्पोर्ट्सले यसअघि पुरुष ७–अ–साइड फुटबल प्रतियोगिता आयोजना गरिसकेको छ। उक्त प्रतियोगितामा राष्ट्रिय स्तरका खेलाडीसहित ३२ टोली सहभागी भएका थिए।

पहिलो आयोजनाबाट प्राप्त अनुभवलाई आधार बनाउँदै संस्थाले महिला खेलाडीका लागि पनि व्यवस्थित र प्रतिस्पर्धात्मक प्लेटफर्म निर्माण गर्न इन्डोर फुटबल प्रतियोगिता आयोजना गरेको जनाएको छ।

‘प्रतिभा छ, अवसरको आवश्यकता छ’

पेसएक्स स्पोर्ट्सकी संस्थापक तथा अध्यक्ष संगीता कर्णका अनुसार नेपालमा खेल प्रतिभाको कमी छैन। तर प्रतिभा पहिचान, उचित प्रशिक्षण, व्यवस्थापन र पर्याप्त प्रतिस्पर्धात्मक अवसरको अभाव अझै चुनौतीका रूपमा रहेको छ।

यही अवस्थालाई सम्बोधन गर्न पेसएक्स स्पोर्ट्सले विद्यालय तथा समुदायस्तरबाटै खेल प्रतिभा पहिचान गरी नियमित प्रशिक्षण, अभ्यास र दीर्घकालीन विकासको अवसर सिर्जना गर्ने लक्ष्य राखेको छ।

संस्थाले आफूलाई केवल प्रतियोगिता वा प्रशिक्षणमा सीमित नराखी खेलाडी, विद्यालय, समुदाय, निजी क्षेत्र र खेलकुदसम्बन्धी निकायलाई जोड्ने साझा मञ्चका रूपमा विकास गर्ने जनाएको छ।

खेलाडीको समग्र विकासमा जोड

पेसएक्स स्पोर्ट्सले खेलाडीको शारीरिक क्षमतासँगै मानसिक सुदृढता, अनुशासन, टोली भावना, नेतृत्व क्षमता र खेल आचारसंहिताको विकासलाई समेत प्राथमिकता दिने जनाएको छ।

विद्यालय तथा कलेजसँग सहकार्य गरी अध्ययन र खेलकुदलाई सँगसँगै अघि बढाउने, निजी तथा संस्थागत क्षेत्रमा खेलकुद र स्वास्थ्य कार्यक्रम सञ्चालन गर्ने तथा समुदायमा आधारित प्रतियोगिता र प्रशिक्षण शिविर विस्तार गर्ने संस्थाको योजना छ।

राष्ट्रिय खेलकुद परिषद्को ‘स्वास्थ्यका लागि खेलकुद, राष्ट्रका लागि खेलकुद’ भन्ने नारालाई व्यवहारमा लागू गर्ने उद्देश्यसहित स्वस्थ जीवनशैली र कार्यसंस्कृतिसँग खेलकुदलाई जोड्ने योजना पनि संस्थाले अघि सारेको छ।

सहकार्यबाट दीर्घकालीन खेलकुद प्रणाली

नेपाली खेलकुदको विकासका लागि सहकार्य आवश्यक रहेको भन्दै पेसएक्स स्पोर्ट्सले प्रशिक्षक, पूर्वखेलाडी, विद्यालय, खेल संघ–संस्था, स्थानीय तह, निजी क्षेत्र तथा सञ्चारमाध्यमसँग सहकार्य गर्ने जनाएको छ।

संस्थाको दीर्घकालीन लक्ष्य स्थानीयस्तरमा रहेका प्रतिभालाई पहिचान गरी उनीहरूलाई राष्ट्रिय तथा अन्तर्राष्ट्रिय स्तरको प्रतिस्पर्धासम्म पुग्ने स्पष्ट बाटो निर्माण गर्नु हो।

युवा पुस्तामा लगानी, खेल शिक्षा र समुदायको सहभागितामार्फत सक्षम खेलाडी उत्पादनसँगै स्वस्थ, अनुशासित र जिम्मेवार नागरिक निर्माणमा योगदान पुर्‍याउने प्रतिबद्धता पेसएक्स स्पोर्ट्सले जनाएको छ।

आजदेखि सुरु हुने महिला इन्डोर फुटबल टुर्नामेन्ट २०२६ लाई पेसएक्स स्पोर्ट्सले नेपाली महिला फुटबलमा आफ्नो दीर्घकालीन यात्राको सुरुवाती कदमका रूपमा लिएको छ।