मुस्ताङमा आजदेखि जलवायु सम्मेलन

मुस्ताङ । मुस्ताङमा आजदेखि ‘घरपझोङ जलवायु सम्मेलन २०८३’ सुरु हुँदै छ । सम्मेलनको आज कृषि वन तथा पर्यावरणमन्त्री गीता चौधरीले उद्घाटन गर्ने कार्यक्रम छ । सम्मेलनमा भाग लिन ४२१ स्थानीय तह र ३६ जिल्ला समन्वय समितिका जनप्रतिनिधि सोमबार साँझ मुस्ताङ आइपुगेका छन् ।

सोमबार साँझसम्म सातै प्रदेशका महानगर, उपमहानगर, नगर र गाउँपालिकाका जनप्रतिनिधिसहित दुई हजारभन्दा बढी अतिथि मुस्ताङ आइपुगेको घरपझोङ गाउँपालिकामा प्रमुख प्रशासकीय अधिकृत भीमकुमार बस्नेतले जानकारी दिए ।

सम्मेलनको व्यवस्थापनका लागि पालिकाअन्तर्गतका पाँचै वडाका गाउँ समाज, आमा समूह, युवा क्लब र अन्य संघसस्थालाई परिचालन गरिएको गाउँपालिका उपाध्यक्ष जमुना थकालीले जानकारी दिइन् ।

सम्मेलनस्थलभित्र २८ फिट उचाइको जलवायु परिवर्तनको असरसम्बन्धी जनचेतना झल्काउने पृथ्वी रोइरहेको बेलुनको गोलाकार आकृति राखिएको छ ।

मुस्ताङका कृषि उत्पादनको प्रचारप्रसार गर्ने उद्देश्यका साथ पचासभन्दा बढी स्टल राखिएको गाउँपालिकाका कृषि शाखा अधिकृत रोशन थकालीले जानकारी दिए ।

दुई दिनसम्म चल्ने सम्मेलनले जलवायु परिवर्तनको असरसम्वन्धी घोषणापत्र जारी गर्नेछ ।

दुलहीजस्तै सिँगारिँदै छ जोमसोम बजार

हिमालपारिको जिल्ला मुस्ताङको सदरमुकाम जोमसोम लगायत पुरै पालिकामा घरपझोङ जलवायु सम्मेलन–२०८३ को तयारीसँगै छुट्टै रौनक छाएको छ । पालिकाको निर्देशन बमोजिम सम्पूर्ण गाउँलेहरूले आ आफ्नो जिम्मेवारी वहन गरेको छ ।

घरपझोङ गाउँपालिकाको आयोजनामा हुने सम्मेलनको तयारीका लागि गाउँपालिका अध्यक्ष मोहनसिंह लालचनसहित सम्पूर्ण जनप्रतिनिधि साँझसम्म व्यवस्थापनमा व्यस्त रहेका छन् । गाउँपालिकाका कर्मचारीहरू पनि आ–आफ्नो जिम्मेवारी सम्हाल्दै कार्यक्रमको तयारीमा जुटेका छन् ।

गाउँपालिकाका प्रमुख प्रशासकीय अधिकृतसमेत टेम्पोमा सामान ढुवानी गर्दै गाउँपालिकादेखि कभर्डहलसम्म टेम्पोमा सामान ओसारिरहेको दृश्य देखियो । जनप्रतिनिधि र कर्मचारी मात्र होइन, घरपझोङ गाउँपालिकाका स्थानीय बासिन्दा, विभिन्न गाउँका प्रतिनिधि ,समूह तथा क्लबका सदस्यहरू पनि आ–आफ्नो गाउँमा लुङ्ता राख्न, स्वागतद्वार बनाउन तथा अन्य तयारीका काममा दिनभर व्यस्त रहे ।

साँझपख विभिन्न जिल्लाबाट आएका जनप्रतिनिधिहरू पनि घरपझोङ गाउँपालिका प्रवेश गर्न थालेका छन् । कोही होटेलमा त कोही होमस्टेमा बसेका कारण जोमसोम बजार र अन्य गाउँहरू सबैमा पाहुनाहरूले भरिन थालेको छ ।

अझ भन्नुपर्दा, जोमसोम, मार्फा र स्याङमा जडित स्याउको आकृतिसहितका युरोपेली शैलीका सडक बत्ती बल्न थालेपछि बजारको सौन्दर्य झनै बढेको छ । गाउँपालिकाभित्र ललितपुर महानगरपालिकाको सहयोगमा निर्माण गरिएको फाल्चामा झिलिमिली बत्तीले घरपझोङमा आउने पाहुना, सहभागी तथा अन्य आगन्तुकलाई समेत आकर्षित गरेको छ ।

चारैतिर सरसफाइ, सजावट, स्वागतद्वार र लुङ्ताले सिँगारिएको जोमसोम बजार हेर्दा यति बेला बिहेको तयारीमा सजिएकी दुलहीजस्तै देखिन्छ । स्थानीयहरूको उत्साह, जनप्रतिनिधिको सक्रियता र पाहुनाहरूको आगमनले जोमसोममा छुट्टै रौनक छाएको छ ।

मुस्ताङको प्राकृतिक सौन्दर्यबिच सिँगारिएको जोमसोम बजारले भोलिबाट सुरु हुने घरपझोङ जलवायु सम्मेलनको भव्यताको संकेत दिइरहेको छ ।