बाढीपीडितका लागि नेपाली क्लब बहराइनद्वारा मानवीय मलहम, ४ लाख १८ हजार ९३७ रुपैयाँ प्रधानमन्त्री दैवी प्रकोप उद्धार कोषमा जम्मा

बहराइन । रसुवाको भोटेकोशी क्षेत्रमा आएको बाढीबाट प्रभावित नागरिकको उद्धार, राहत तथा पुनर्स्थापनाका लागि नेपाली क्लब, बहराइनले मानवीय सहयोगको हात अघि बढाएको छ। क्लबद्वारा गत साता सञ्चालन गरिएको स्वैच्छिक आर्थिक सहयोग संकलन अभियानबाट १ हजार ४८.६५ बहराइनी दिनार अर्थात् ४ लाख १८ हजार ९ सय ३७ नेपाली रुपैयाँ संकलन गरी प्रधानमन्त्री दैवी प्रकोप उद्धार कोषमा जम्मा गरिएको छ।

नेपाली क्लब, बहराइनले ६ सेप्टेम्बर २०२६ मा उक्त रकम प्रधानमन्त्री दैवी प्रकोप उद्धार कोषको खातामा जम्मा गरेको जानकारी दिएको हो। बाढीबाट प्रभावित नागरिकको उद्धार, राहत तथा पुनर्स्थापनामा सहयोग पुगोस् भन्ने उद्देश्यले अभियान सञ्चालन गरिएको क्लबले जनाएको छ।

विपद्को समयमा देशभन्दा टाढा रहे पनि नेपाली समुदायले मातृभूमिको पीडालाई आफ्नै पीडाका रूपमा लिएर सहयोगका लागि अघि बढेको यो अभियानले प्रवासमा रहेको नेपाली समुदायको मानवीय संवेदनालाई उजागर गरेको छ। व्यक्तिगत रूपमा गरिएको स्वैच्छिक सहयोगदेखि संस्थागत तथा कम्पनीस्तरबाट प्राप्त सहयोगसम्मलाई अभियानमा समेटिएको क्लबले जनाएको छ।

नेपाली क्लब, बहराइनका अध्यक्ष दीपक गुरुङले भोटेकोशी बाढीबाट प्रभावित नागरिकको पीडामा सबैले आ–आफ्नो ठाउँबाट मलहम लगाउनुपर्ने बताएका छन्। उनले विपद्को समयमा सहयोगको आकारभन्दा संकटमा परेका नागरिकप्रतिको संवेदना र साथ महत्वपूर्ण हुने भन्दै सक्ने सबैलाई सहयोगमा जुट्न आग्रह गरेका छन्।

‘यो विपद् पीडितको मात्र होइन, हामी सबैको साझा पीडा हो। यस्तो कठिन परिस्थितिमा आफ्नो क्षमताअनुसार सहयोग गरेर पीडितको घाउमा मलहम लगाउन सबैमा अनुरोध गर्दछु,’ अध्यक्ष गुरुङले भने।

गुरुङका अनुसार विपद्को समयमा तत्काल उपलब्ध गराइने सानो सहयोगले पनि पीडित परिवारलाई ठूलो मनोबल दिन सक्छ। घर, सम्पत्ति तथा जीविकोपार्जनका आधार गुमाएका परिवार संकटमा रहेका बेला विदेशमा रहेका नेपालीले आफ्नो क्षमता र अवस्थाअनुसार सहयोग गर्नु सामाजिक तथा मानवीय दायित्वसमेत भएको उनको भनाइ छ।

क्लबका अनुसार सहयोग संकलन अभियानमा बहराइनमा रहेका नेपालीहरूले स्वैच्छिक रूपमा योगदान गरेका थिए। व्यक्तिगत सहयोगसँगै विभिन्न संस्था तथा कम्पनीहरूले समेत आ–आफ्नो क्षमताअनुसार सहयोग गरेका छन्। सबै रकम एउटै माध्यमबाट मात्र पठाइएको भने छैन। कतिपय व्यक्ति, संस्था तथा कम्पनीहरूले आफूले संकलन गरेको सहयोग रकम आ–आफ्नै माध्यम र प्रक्रियाबाट समेत सम्बन्धित निकायमा पठाएका छन्।

यसकारण प्रधानमन्त्री दैवी प्रकोप उद्धार कोषमा नेपाली क्लब, बहराइनको अभियानमार्फत जम्मा भएको ४ लाख १८ हजार ९ सय ३७ रुपैयाँ बहराइनस्थित नेपाली समुदायबाट भोटेकोशी बाढीपीडितका लागि भएको समग्र सहयोगको एउटा हिस्सा मात्र रहेको क्लबले स्पष्ट पारेको छ।

भोटेकोशी क्षेत्रमा बाढीले पुर्‍याएको क्षतिपछि प्रभावित परिवारलाई तत्काल राहतसँगै दीर्घकालीन पुनर्स्थापनाको आवश्यकता देखिएको छ। प्राकृतिक विपत्तिले घर, व्यवसाय, सम्पत्ति तथा दैनिक जीविकोपार्जनका आधारमा क्षति पुर्‍याएका परिवारलाई खाद्यान्न, आवास, स्वास्थ्य सेवा तथा अन्य अत्यावश्यक सामग्रीको आवश्यकता पर्न सक्छ। त्यसपछि क्षतिग्रस्त संरचनाको पुनर्निर्माण र प्रभावित परिवारको जीविकोपार्जन पुनःस्थापना अर्को चुनौती बन्नेछ।

यस्तो अवस्थामा सरकारी राहत तथा उद्धार प्रयाससँगै निजी क्षेत्र, सामाजिक संघसंस्था र प्रवासी नेपाली समुदायबाट हुने सहयोगले पीडित परिवारको राहतमा महत्वपूर्ण योगदान पुर्‍याउन सक्छ। तर सहयोगसँगै त्यसको पारदर्शी परिचालन र वास्तविक पीडितसम्म प्रभावकारी रूपमा राहत पुग्नु पनि उत्तिकै आवश्यक हुन्छ। नेपाली क्लब, बहराइनले संकलित रकम प्रधानमन्त्री दैवी प्रकोप उद्धार कोषमा जम्मा गरेर आधिकारिक उद्धार संयन्त्रमार्फत सहयोग पुर्‍याउने बाटो रोजेको जनाएको छ।

क्लबले अभियानमा प्रत्यक्ष तथा अप्रत्यक्ष रूपमा सहयोग गर्ने सम्पूर्ण दातृ महानुभाव, संस्था तथा कम्पनीप्रति हार्दिक धन्यवाद तथा कृतज्ञता व्यक्त गरेको छ। विपद्को समयमा नेपाली समुदायले देखाएको उदारता, एकता र मानवीय भावनाले प्रभावित परिवारलाई राहत तथा पुनर्स्थापनाको यात्रामा सहयोग पुग्ने विश्वास क्लबले लिएको छ।

अध्यक्ष गुरुङले आगामी दिनमा पनि विपद् तथा मानवीय संकटका बेला नेपाली समुदाय एकजुट भएर सहयोगमा जुट्नुपर्नेमा जोड दिएका छन्। उनका अनुसार संकटमा दिइने सहयोग रकम मात्र नभई पीडित परिवारलाई ‘हामी एक्लो छैनौँ’ भन्ने भरोसा पनि हो।

भौगोलिक दूरीले नेपाली मनलाई विभाजित गर्न नसक्ने उदाहरण बहराइनको यो अभियानले प्रस्तुत गरेको छ। रसुवाको भोटेकोशीमा आएको बाढीले पीडा दिएको समयमा बहराइनमा रहेका नेपालीहरूले आफ्नो क्षमताअनुसार सहयोग जुटाएर पीडितको घाउमा मलहम लगाउने प्रयास गरेका छन्। नेपाली क्लब, बहराइनको यो पहलले विपद्को समयमा नेपाली–नेपालीबीचको एकता, सहकार्य र मानवीय उत्तरदायित्वलाई थप बलियो बनाएको छ।