नेपाल वैदेशिक रोजगार व्यवसायी संघद्वारा ३४औँ वार्षिकोत्सव सम्पन्न, सामाजिक उत्तरदायित्वलाई प्राथमिकतामा

काठमाडौं(जस)–नेपाल वैदेशिक रोजगार व्यवसायी संघ ले आफ्नो गौरवमय ३३ वर्ष सफलतापूर्वक पूरा गरी ३४औँ वर्षमा प्रवेश गरेको अवसरमा सामाजिक उत्तरदायित्वलाई केन्द्रमा राख्दै विविध कार्यक्रमका साथ स्थापना दिवस भव्य रूपमा मनाएको छ । संघले स्थापना दिवसलाई औपचारिक समारोहमा मात्र सीमित नराखी समाजप्रति आफ्नो दायित्व निर्वाह गर्ने उद्देश्यका साथ विभिन्न सेवामूलक कार्यक्रम सञ्चालन गरेको हो ।
यसअन्तर्गत सी आशा फाउन्डेसन अन्तर्गत सञ्चालित आशा विशेष पाठशाला तथा पुनस्र्थापना केन्द्र, सातदोबाटो, ललितपुर मा आश्रित बालबालिका तथा लाभग्राहीका लागि म्युजिकल इन्स्ट्रुमेन्ट, खेलकुद सामग्री, स्टेशनरी तथा खाद्यान्न सहयोग हस्तान्तरण गरिएको छ । त्यसैगरी, श्रम तथा वैदेशिक रोजगारसँग सम्बन्धित सरकारी निकायमा सेवा लिन आउने सेवाग्राहीलाई लक्षित गर्दै शुद्ध पिउने पानीको व्यवस्थापनका लागि आवश्यक सामग्रीसमेत उपलब्ध गराइएको संघले जनाएको छ । संस्थागत उत्तरदायित्व र सामाजिक सेवाको भावनालाई व्यवहारमा उतार्ने उद्देश्यले यस्ता कार्यक्रम आयोजना गरिएको संघको भनाइ छ ।
संघका अध्यक्ष दिकबहादुर खत्रीले ३४औँ वार्षिकोत्सव केवल उत्सवको रूपमा नभई सामाजिक उत्तरदायित्व निर्वाह गर्ने अवसरका रूपमा मनाइएको बताए । उनले संघका सदस्य संस्थाहरू प्रत्यक्ष रूपमा लाभान्वित हुने केही दीर्घकालीन तथा महत्वाकांक्षी योजनाहरू सार्वजनिक गर्ने तयारी रहे पनि समय अभावका कारण यसपटक घोषणा गर्न नसकिएको जानकारी दिए ।

अध्यक्ष खत्रीले निकट भविष्यमै ती योजनाहरू सार्वजनिक गरिने र त्यसले व्यवसायीहरूको संस्थागत क्षमता अभिवृद्धि, व्यवसायी हित संरक्षण तथा वैदेशिक रोजगार क्षेत्रलाई थप व्यवस्थित, मर्यादित र पारदर्शी बनाउन महत्वपूर्ण योगदान पु¥याउने विश्वास व्यक्त गरे । “३४औँ वार्षिकोत्सवलाई सफल बनाउन प्रत्यक्ष तथा अप्रत्यक्ष रूपमा साथ, सहयोग र सहभागिता जनाउनु हुने सम्पूर्ण सदस्य संस्था, पूर्वअध्यक्ष, पूर्वपदाधिकारी, संस्थापक, शुभेच्छुक, सरकारी निकाय, सञ्चारकर्मी तथा सम्पूर्ण सरोकारवालाप्रति हार्दिक आभार व्यक्त गर्दछौं,” अध्यक्ष खत्रीले भने ।
उनले आगामी दिनमा पनि वैदेशिक रोजगार क्षेत्रको सुधार, व्यवसायीहरूको हकहित संरक्षण तथा सामाजिक उत्तरदायित्वका कार्यक्रमलाई निरन्तरता दिँदै अझ प्रभावकारी ढंगले अघि बढ्ने प्रतिबद्धतासमेत व्यक्त गरे । नेपाल वैदेशिक रोजगार व्यवसायी संघले तीन दशकभन्दा लामो यात्रामा वैदेशिक रोजगार क्षेत्रको संस्थागत विकास, व्यवसायीहरूको अधिकार संरक्षण तथा श्रमिकमैत्री नीतिको पैरवी गर्दै आएको छ । ३४औँ वर्षमा प्रवेशसँगै संघले सामाजिक सेवा, व्यवसायी हित र वैदेशिक रोजगार क्षेत्रको सुधारलाई अझ प्रभावकारी रूपमा अघि बढाउने लक्ष्य लिएको जनाएको छ ।