अमेरिकाको नयाँ ‘भिसा बन्ड’ नीति ,अब धरौटी रकम बुझाएपछि मात्रै पाइनेछ प्रवेश अनुमति

उर्मिला खत्री,संयुक्त राज्य अमेरिकाले नयाँ ‘भिसा बन्ड पाइलट कार्यक्रम’ घोषणा गर्दै केही श्रेणीका विदेशी नागरिकका लागि भिसा प्रक्रियामा नयाँ व्यवस्था लागू गर्ने तयारी गरेको छ । अमेरिकाले यो कार्यक्रममार्फत भिसा दुरुपयोग रोक्ने, नियम उल्लंघन घटाउने तथा समयमै स्वदेश फर्किने संस्कृतिलाई मजबुत बनाउने लक्ष्य लिएको जनाएको छ ।
नयाँ व्यवस्थाअनुसार अब भिसा अन्तर्वार्ता पास गरेपछि मात्रै प्रक्रिया पूरा नहुने, बरु योग्य ठहरिएका केही आवेदकले अतिरिक्त धरौटी रकम (Visa Bond) समेत बुझाउनुपर्ने हुन सक्छ । यो कदमलाई अमेरिकाले ‘विश्वसनीय यात्रा व्यवस्थापन’ को नयाँ मोडेलका रूपमा प्रस्तुत गरेको छ ।अमेरिकी कन्सुलर अधिकारीले भिसा अन्तर्वार्ता सफलतापूर्वक सम्पन्न गरेका र कार्यक्रमअन्तर्गत योग्य मानिएका आवेदकलाई विशेष सूचना, भुक्तानी निर्देशिका तथा सीधा लिंक उपलब्ध गराउनेछन् । सूचना प्राप्त गरेपछि सम्बन्धित आवेदकले ३० दिनभित्र तोकिएको बन्ड रकम अनिवार्य रूपमा भुक्तानी गरिसक्नुपर्ने व्यवस्था राखिएको छ ।
बन्ड रकम भुक्तानी सम्पन्न भएपछि मात्रै आवेदकले अधिकतम तीन महिनासम्म मान्य हुने ‘सिंगल इन्ट्री’ (एकपटक प्रवेश गर्न मिल्ने) भिसा प्राप्त गर्नेछन् । यस्तो भिसा लिएका यात्रुले व्यापारिक हवाई मार्ग (Commercial Port of Entry) बाट मात्रै अमेरिकामा प्रवेश गर्न पाउने प्रावधान तय गरिएको छ ।
अमेरिकी प्रशासनले स्पष्ट पारेअनुसार, भिसा धारकले अमेरिकामा अवैध रूपमा काम नगरेको, तोकिएको अवधिभित्र स्वदेश फर्किएको तथा भिसाका सम्पूर्ण शर्त पालना गरेको अवस्थामा धरौटी रकम स्वतः फिर्ता हुने छ । तर, यदि भिसाको दुरुपयोग भएको, समयसीमा नाघेर बसेको वा अन्य नियम उल्लंघन भएको पाइएमा बन्ड रकम जफत हुन सक्ने संकेत गरिएको छ । यसलाई अमेरिकाले भिसा प्रणालीलाई थप जिम्मेवार र अनुशासित बनाउने प्रयास का रूपमा व्याख्या गरेको छ ।
नयाँ व्यवस्थापछि अमेरिका जान तयारीमा रहेका नेपाली विद्यार्थी, पर्यटक तथा अल्पकालीन भ्रमणमा जाने आवेदकबीच ‘के नेपालका नागरिक पनि यो व्यवस्थाभित्र पर्छन् ?’ भन्ने चासो बढेको छ । यद्यपि, अमेरिकी दूतावासले कुन–कुन देश वा आवेदक समूहमा यो कार्यक्रम लागू हुन्छ भन्ने विषय केस–टु–केस आधारमा निर्धारण हुने जनाएको छ ।
नेपालस्थित अमेरिकी दूतावासका अनुसार यो कार्यक्रमले भिसा नियमको पालना सुनिश्चित गर्ने, गैरकानुनी बसाइ कम गर्ने तथा आवागमन प्रणालीलाई अझ व्यवस्थित बनाउने अपेक्षा गरिएको छ । यस सम्बन्धी विस्तृत जानकारीका लागि आवेदकहरूले अमेरिकी दूतावासको आधिकारिक वेबसाइट वा कन्सुलर सेवा विभाग मार्फत जानकारी लिन सक्ने जनाइएको छ ।