मलेसियामा जालसाजी गिरोह ध्वस्त,३ नेपालीसहित ९ पक्राउ,सिन्डिकेटधारीलाई पनि कारवाहीको दायरामा ल्याईने

पुत्रजया,मलेसिया – मलेसियाको राजधानी क्षेत्रमा लामो समयदेखि जरा गाडेर बसेको कागजात जालसाजी गिरोहमाथि मलेसियाली अध्यागमन विभागले निर्णायक प्रहार गरेको छ। करिब सात वर्षदेखि सक्रिय उक्त संगठित सिन्डिकेटलाई सोमबार र मंगलबार गरिएको संयुक्त अपरेशनमार्फत ध्वस्त पारिएको हो।
अध्यागमन विभागका महानिर्देशक दातुक जकारिया शाबानका अनुसार सार्वजनिक सूचना, मिडिया रिपोर्ट र करिब छ महिनासम्मको गुप्तचर निगरानीपछि यो अपरेशन सफल भएको हो। प्रारम्भिक अनुसन्धानले गिरोहले हालसम्म करिब १०० मिलियन रिंगिट बराबरको अवैध आम्दानी गरेको देखाएको छ, जसले यसको नेटवर्क कति गहिरो र संगठित थियो भन्ने स्पष्ट पार्छ।
छापा मार्ने क्रममा सुरक्षाकर्मीहरूले नक्कली ई पास, सुरक्षा स्टिकर, संशोधित अध्यागमन कागजातलगायत ठूलो परिमाणमा सामग्री बरामद गरेका छन्। त्यस्तै १११ वटा विभिन्न देशका राहदानी, १० ल्यापटप, ६ मोबाइल फोन र हजारौ रिंगेट नगद समेत जफत गरिएको छ।
यस प्रकरणमा २६ देखि ६१ वर्ष उमेर समूहका ९ जनालाई पक्राउ गरिएको छ। पक्राउ पर्नेमा ३ जना नेपाली नागरिक, ३ भारतीय, १ बंगलादेशी, १ स्थानीय पुरुष र १ भियतनामी महिला रहेकि छन्। प्रारम्भिक अनुसन्धान अनुसार उक्त भियतनामी महिलाले कम्पनी निर्देशकको आवरणमा गिरोह सञ्चालनमा भूमिका खेलेको आशंका गरिएको छ।
अध्यागमन प्रमुख शाबानले उक्त गिरोह अवैध रूपमा विदेशी नागरिक मलेसिया भित्र्याउने कार्यमा समेत संलग्न भएको बताएका छन्। यसले मानव तस्करी र संगठित अपराधबीचको सम्भावित सम्बन्धतर्फ पनि संकेत गरेको छ।
अनुसन्धानलाई थप सुदृढ बनाउन ६ जनालाई साक्षीका रूपमा समन (फारम–२९) जारी गरिएको छ। अहिले यो मुद्दा अध्यागमन ऐन तथा मनी लन्ड्रिङ र आतंकवाद वित्त पोषण नियन्त्रणसम्बन्धी कानुन अन्तर्गत अघि बढाइएको छ।
यस घटनामा मलेसियाको Royal Malaysian Police (PDRM) र Inland Revenue Board सँग समन्वय गरेर वित्तीय कारोबार र अन्तर्राष्ट्रिय सञ्जालको पत्ता लगाउने काम तीव्र पारिएको छ। फरार रहेका अन्य सदस्यको खोजी र गिरोहको सम्पूर्ण संरचना उजागर गर्ने अभियान जारी रहेको सम्बन्धित निकायले जनाएको छ।
यो कारबाहीले मलेसियामा गैरकानुनी आप्रवासन र कागजात जालसाजीविरुद्ध कडा सन्देश दिएको छ भने विदेशी कामदारहरूलाई लक्षित गर्दै सञ्चालन हुने आपराधिक सञ्जालमाथि थप निगरानी आवश्यक रहेको स्पष्ट पारेको छ।
मलेसियाले योसङ्गै सिन्डिकेट गराउने समुहलाई पनि तार्गेट गरेको छ । केही मलेसियन समुहसङ्ग मिलेर केही नेपालीले बर्शौदेखि गर्दै आएको सिन्डिकेट तोड्ने र कारवाहिको भागेदार बनाईने जनाईएको छ ।