वीरगञ्ज महानगरपालिकालाई बैंकहरुले नौ थान कम्प्युटर हस्तान्तरण

वीरगञ्ज, पर्सा, २४ मङ्सिरः जेनजी आन्दोलनको क्रममा क्षतिग्रस्त तथा तोडफोड भएको वीरगञ्ज महानगरपालिकालाई यहाँका बैंकहरुले नौ थान कम्प्युटर हस्तान्तरण गरेका छन् ।

गत भदौ २३ र २४ गते भएको जेनजी आन्दोलनको क्रममा यहाँको महानगरमा लुटपाट, तोडफोड र आगजनीबाट ठूलो क्षति भएको थियो । वीरगञ्जमा रहेका एभरेष्ट, लक्ष्मी सनराइज, सिद्धार्थ, कुमारी, ग्लोबल आइएमई, प्रभु, माछापुच्छे, सिटिजन बैंक इन्टरनेशनल र प्राइम कमर्सियल बैंक लिमिटेडका प्रतिनिधिले आज एक कार्यक्रमबीच नौ थान कम्प्युटर महानगर प्रमुख राजेशमान सिंहलाई हस्तान्तरण गरेका हुन् ।

प्रमुख सिंहले सिंहले बैंकहरूले सङ्कटको बेला सहयोग गरेर उदाहरणीय काम गरेको बताउनुभयो । “महानगरको सम्पत्ति जल्नु भनेको नगरवासीकै सम्पत्ति नष्ट हुनु हो, यस्तो कठिन घडीमा साथ र समर्थन जनाउने सबै सङ्घ–संस्थाप्रति हामी कृतज्ञ छौँ”, उहाँले भन्नुभयो, “यसले फेरि उठ्ने हिम्मत र ऊर्जा दिएको छ”, उहाँले भन्नुभयो ।

बैंकर एसोसिएसन पर्साका संयोजक एवं लक्ष्मी बैंक वीरगञ्ज शाखाका प्रमुख रोहिणी आचार्यले नगरवासीलाई सहज सेवा उपलब्ध गराउनु बैंकहरूको दायित्व भएको बताउँदै महानगरपालिकालाई आवश्यक उपकरण उपलब्ध गराएको जानकारी दिनुभयो । यसअघि सूर्य नेपाल, औषधि व्यवसायी सङ्घ पर्सा, एनपिएल समाज कल्याण संस्था, ब्रिटानिया नेपाललगायत विभिन्न सङ्घ–संस्थाले कम्प्युटर, ल्यापटप, प्रिन्टर तथा फर्निचर सामग्री सहयोग गरिसकेका छन् ।