सर्लाहीको चन्द्रनगरस्थित फरिद टोलमा विद्यालय बस पल्टिँदा पाँच विद्यार्थी घाइते

सर्लाही । सर्लाहीको चन्द्रनगर गाउँपालिका–१, फरिद टोलमा सोमबार विद्यालय बस पल्टिँदा पाँच जना विद्यार्थी र चालक घाइते भएका छन्।

गाउँबाट विद्यार्थी लिएर विद्यालयतर्फ लिएर आउँदै गरेको ईश्वरपुर नगरपालिकास्थित बयलवासमा रहेको माउन्ट कन्चनजङ्घा बोर्डिङ स्कुलको ना.५ ख. ७३७३ नम्बरको बस अनियन्त्रित भएर धान खेतमा पल्टिएको इलाका प्रहरी कार्यालय केशरगन्जले जनाएको छ ।

दुर्घटनामा बस चालक ३२ वर्षीय रामकरण महतो, विद्यार्थी सात वर्षीया सृष्टी साह, १० वर्षीय सोनुकुमार महतो, सात वर्षीया सनीकुमार महतो, नौ वर्षीया सोनमकुमारी महतो र १३ वर्षीया उषा महतो घाइते भएका छन् ।

घाइते सबैको अवस्था सामान्य रहेको प्रहरीले जनाएको छ । घाइतेहरूको लालबन्दीस्थित मोडेल अस्पतालमा उपचार भइरहेको केशरगन्जका प्रहरी निरीक्षक उमाकान्त जोशीले जानकारी दिनुभयो ।