मेनपावर नवीकरणमा समस्या परे एशोसिएसनले सहयोग गर्ने

काठमाडौं (जस)–नेपाल लोकतान्त्रिक वैदेशिक रोजगार व्यवसायी एशोसिएसनले मेनपावर कम्पनी नवीकरणमा समस्या परे सहयोग गर्ने भएको छ । एशोसिएसन अध्यक्ष दीपक थापाले एक विज्ञप्ति जारी गर्दै नवीकरण कार्यमा केही समस्या भएमा लोकतान्त्रिक एशोसिएसन हिजो, आज र भोलिका दिनहरुमा समेत साथमा रहने प्रतिबद्धता ब्यक्त गरेका छन् ।
‘आ.व २०८१÷०८२ मा १०० जना कामदार नपुगेका कारण ईजाजतपत्रहरू नविकरण नभएको समस्यालाई लोकतान्त्रिक एशोसिएसनले अत्यन्तै गम्भिर र संवेदनशील रूपमा लिएर निरन्तर रुपमा अगाडि बढिरहेको थियो । श्रम, रोजगार तथा सामाजिक सुरक्षा मन्त्री, माननीय शरत सिंह भण्डारी, संघका अध्यक्ष भूवनसिंह गुरुङ, सल्लाहकारहरु र बैदेशिक रोजगार विभागका महानिर्देशक कमलप्रसाद भटराईसमक्ष ब्यवसायीहरुले ईजाजतपत्र नविकरणमा झेल्नु परेका समस्या समाधानको बारेमा लोकतान्त्रिक एशोसिएसनले पटक–पटक गरेको गहन छलफलले आज पूर्णरूपमा सार्थकता पाएका छौ’, विज्ञप्तिमा छ ।
थापाद्धारा जारी विज्ञप्तिमा श्रम, रोजगार तथा सामाजिक सुरक्षा मन्त्री शरतसिंह भण्डारी, संघका अध्यक्ष भूवन सिंह गुरुङ ,प्रति विशेष रुपमा हार्दिक धन्यवाद व्यक्त गरिएको छ भने सम्पूर्ण व्यवसायीलगायत सबैलाई हार्दिक बधाई तथा शुभकामना व्यक्त गरिएको छ ।