एसीसी यू–१६ इस्ट जोनको सेमिफाइनलको समीकरण पुरा

भुटानमाथि नेपालको २९८ रनको जित, नेपालको सामना मलेसियासँग
काठमाडौं(जस)–एसीसी यू–१६ इस्ट जोन प्रतियोगिताको सेमिफाइनलको समीकरण पुरा भएको छ । मंगलबार समुह चरणका खेल सकिएपछि सेमिफाइनलको समीकरण पुरा भएको हो । समुह ए बाट नेपालले आफ्ना चारै खेल जितेर शिर्ष स्थानमा रहदै सेमिफाइनलमा पुगेको छ भने समुह ए बाट सिंगापुर ४ खेलमा ३ खेल जितेर समुहमा दोस्रो हुदै सेमिफाइनलमा पुगेको छ । त्यस्तै समुह ए बाट जापान, इन्डोनेसिया र भुटान बाहिरिएका छन् ।
त्यसैगरी समुह बी बाट हङकङ चाइनाले चारै खेल जितेर समुह विजेता हुदै सेमिफाइनलमा पुगेको छ । त्यस्तै मलेसियाले ३ खेल जितेर दोस्रो हुदै सेमिफाइनलमा पुगेको छ । समुह बी बाट थाइल्याण्ड, म्यान्मार र माल्दिभ्स समुह चरणबाटै बाहिरिएका छन् । अब सेमिफाइनलमा नेपालको सामना मलेसियासँग हुने भएको छ भने अर्को सेमिफाइनलमा हङकङ चाइना र सिंगापुर खेल्ने छन् । सेमिफाइनलका दुवै खेल विहिबार हुने छन् । त्यस्तै तेस्रो स्थान र फाइनल खेल आगामी शनिबार हुने छन् ।
भुटानमाथि नेपालको २९८ रनको जित
नेपालले भुटानलाई २९८ रनले पराजित गरेको छ । जारी एसीसी यू–१६ इस्ट जोन प्रतियोगिता अन्तर्गतको खेलमा नेपालले दिएको ३५९ रनको लक्ष्य पछाएको भुटान ३२.४ ओभरमा ६० रन बनाएर अल आउट भएपछि नेपाल २९८ रनले विजयी भएको हो । भुटानको ब्याटिंग लाइन ध्वस्त गर्ने क्रममा नेपाली बलर विपिनप्रसाद शर्माले ४ विकेट लिए भने सुयोग भट्टराई र सचिन भट्टले २–२ विकेट लिए । यसअघि टस जितेर पहिला ब्याटिंग गरेको नेपालले ५० ओभरमा ५ विकेट गुमाउदै ३५८ रन बनाएको थियो ।
नेपालका लागि रौनक श्रीवास्तवले अविजित १६८ रनको शतकीय पारी खेलेका थिए । त्यस्तै जोय थापाले अविजित ६१ रन बनाए भने शिवांश बजगाईंले ५४ र सुगम बुढाथोकीले ३५ रन बनाएका थिए । त्यस्तै भुटानका बलर सांगे दोर्जीले ३ विकेट लिएका थिए । यो जितपछि नेपाल समुह ए मा चारै खेल जितेर समुहमा शिर्ष स्थानमा रहेर सेमिफाइनलमा पुगेको छ । यस समुहबाट सिंगापुर दोस्रो स्थानमा रहदै सेमिफाइनलमा पुगेको छ । त्यसैगरी भुटानले भने आफ्ना चारै खेलमा हार बेहोरेर बाहिरिएको छ ।