इन्फिनिटी क्लबको उदघाटनको लागि गायक शिव परियार कतारमा,शुक्रवार प्रस्तुती

दोहा, इन्फिनिटी क्लबको उदघाटनमा सांगीतिक प्रस्तुति दिन गायक शिव परियार बुधवार कतार आएका छन । कतारमा क्लब व्यवसाय सफलतापूर्वक सञ्चालन गरिरहेका युवा व्यवसायी रमेश केसी र सन्दीप भट्टराईले मिलेर सञ्चालनमा ल्याउन लागेको “इन्फिनिटी क्लब”को शुक्रबार हुने समुद्घाटन कार्यक्रममा प्रस्तुति दिन परियार दोहा आईपुगेका हुन । बुधबार कतार आइपुगेका परियारलाई स्वागतका लागि हमाद अन्तर्राष्ट्रिय विमानस्थलमा क्लब सञ्चालक रमेश केसी, कार्यक्रम संयोजक रोशन अर्याल, लक्ष्मी दर्नाललगायतका व्यक्तिहरू एयरपोर्ट पुगेका थिए । परियारले कतारमा रहेका नेपालीहरुलाई कार्यक्रममा निमन्त्रणासमेत गरेका छन । उनका पिउँदिन भन्दा भन्दै पिलायो साथीले, धोकेबाज हौ तिमी, क्या दामी भो, पागल बनायौ प्रियलगायत सयौं सुपरहिट गीतहरु रहेका छन ।
उनले शुक्रबार कतारको पुरानो एयरपोर्ट रोडमा रहेको होटेल स्टाटियोको सातौं तलामा अवस्थित इन्फिनिटी क्लबमा सांगीतिक प्रस्तुति दिने जनाएका छन । शुक्रबार सार्वजनिक बिदाको दिन पारेर समुद्घाटन तथा सांगीतिक कार्यक्रम गर्न लागिएको हो । कार्यक्रममा प्रवेस ४ बजेबाट खुल्ने र साँझ ६ बजेबाट सांगीतिक प्रस्तुति शुरु हुनेछ ।कार्यक्रममा प्रवेश शुल्क पचास रियाल रहेको कार्यक्रम संयोजक रोशन अर्यालले  बताए ।