प्रधानमन्त्री प्रचण्डको दोहा भर्मण स्थगितपछि उपप्रधानमन्त्री श्रेष्ठ जाँदै

काठमाडौं, प्रधानमन्त्री पुष्पकमल दाहाल प्रचण्ड विशेष राजनितीक घटनाक्रमका कारण नजाने भएपछि दोहा, कतारमा  हुने अतिकम विकसित मुलुकहरू (एलडीसी)को सम्मेलनमा भाग लिन उपप्रधान एवं भौतिक पूर्वाधार तथा यातायात मन्त्री नारायणकाजी श्रेष्ठ जाने भएका छन । सोमबार बसेको मन्त्रिपरिषद बैठकले मन्त्री श्रेष्ठलाई सम्मेलनमा भाग लिन जान अनुमति दिएको श्रेष्ठकाे सचिवालयले जनाएको छ ।सचिवालयका अनुसार १९ फागुनमा श्रेष्ठ नेतृत्वको प्रतिनिधिमण्डल दोहा जानेछ भने २३ फागुनमा स्वेदश फर्कने कार्यक्रम तय भएको छ । एलडीसी राष्ट्रहरूको सम्मेलन यही मार्च ५ देखि मार्च ९ सम्म कतारको दोहामा  हुँदैछ । पाँचौँ राष्ट्रसंघीय सम्मेलनमा ‘सम्भावनादेखि समृद्धिसम्म’ शिर्षकमा बहस भैरहेको छ । राष्ट्रपति तथा उपराष्ट्रपति निर्वाचनको तयारीलगायत विविध कारणले प्रधानमन्त्री प्रचण्डको शुक्रबार कतार जाने कार्यक्रम अन्तिममा आएर स्थगित भए पछि सो सम्मेलनमा भाग लिन श्रेष्ठलाई पठाउने मन्त्रीपरिषदले निर्णय गरेको छ ।