काठमाडौं, १४ असार । समूह चरणमा उत्कृष्ट प्रदर्शन गरेको नेदरल्यान्ड्स जारी युरोकप फुटबलको अन्तिम १६ बाटै बाहिरिएको छ । आइतबार राति सम्पन्न खेलमा १० खेलाडीमा सीमित नेदरल्यान्ड्स चेक रिपब्लिकसँग २-० ले स्तब्ध बन्यो ।
चेक रिपब्लिकको जीतमा टोमस होल्स र प्याट्रिक स्किकले १-१ गोल गरेका थिए । दुवै गोल दोस्रो हाफमा नेदरल्यान्ड्स १० खेलाडीमा सीमित भएपछि भएका थिए ।
५५औं मिनेटमा माथिउस डे लिग्टले हातले बल छोएपछि पहेंलो कार्ड पाएका थिए । भिएआरबाट सम्भावित रातो कार्डको परीक्षण गर्दा उनलाई रातो कार्ड दिइएको थियो ।
६८औं मिनेटमा होल्सले हेडरमार्फत गोल गर्दै नेदरल्यान्ड्सविरुद्ध सुनौलो अग्रता दिलाए । ८०औं मिनेटमा स्किकले गोल गरेपछि नेदरल्यान्ड्सको यात्रा समाप्त हुने पक्कापक्की भएको थियो ।
नेदरल्यान्ड्सले समूह चरणका तीनवटै खेलमा जीत निकालेर समूहविजेता बनेको थियो । समूह चरणको जस्तो प्रदर्शन भने आजको खेलमा हुन सकेन र नेदरल्यान्ड्सको उपाधि जित्ने सपना अधुरै रह्यो ।
चेक रिपब्लिकले अब सेमिफाइनल प्रवेशका लागि डेनमार्कसँग प्रतिस्पर्धा गर्ने छ ।
© 2026 All right reserved | Site By : sobij
