चेकआउट मेमो लिएर रोकिएका नेपाली मलेसियाबाट सहजै नेपाल फर्कन पाउने, कतारमा असार एकबाट मागपत्र प्रमाणीकरण, ओमानमा दूतावासको घुम्ती सेवा

काठमाडौं(जस)–मलेसियामा लकडाउनको समय दुई हप्ता थप भएको छ । मलेसियाले यसअघि जारी गरेको लकडाउनको समय जुन १५ देखि सकिदैछ । यसै सन्दर्भमा मलेसियामा पछिल्ला दिनमा दैनिक पाँच हजारभन्दा धेरै संक्रमित थपिने गरेको भन्दै मलेसिया सरकारले लकडाउनको अवधि दुई हप्ता थपेर आगामी जुन २८ सम्म लम्ब्याउने निर्णय गरेको हो । मलेसियाका सिनियर मन्त्री दातुक सेरी स्मैल साबरी याकोबले शुक्रबार कोरोना सङ्क्रमण दर नघटेको भन्दै अहिले कायम रहेको लकडाउन थप दुई हप्ता लम्ब्याउने घोषणा गरेका हुन् ।
अहिले मलेसियामा दैनिक पाँच हजारभन्दा धेरै संक्रमित थपिइरहेका छन् । बिहीबार मात्रै ६ हजार ८७१ जनामा कोरोना संक्रमण पुष्टि भएको थियो । लकडाउनको समयमा अत्यावश्यक बाहेक आर्थिक र सामाजिक गतिविधिमा मलेसियाले प्रतिबन्ध लगाएको छ ।
मलेसियाले लकडाउनको अवधि थप गरेसँगै मलेसियाबाट नेपाल फर्किने तयारीमा रहेका नेपालीहरु भने समस्यामा परेका छन् । मलेसियामा स्वदेश फर्किने तयारीमा रहेका एक नेपाली कामदारले नेपाल आउन चेक आउट मेमो लिइसकेको अवस्थामा थप भएको लकडाउनका कारण आफुहरु समस्यामा परेको जानकारी दिए । उनले आफुलगायत साथीहरुसँग खानेबस्ने रकमको अभावसमेत रहेको बताए । यस्तो समस्यालाई लिएर मलेसियास्थित नेपालीको हकहितमा काम गर्दै आएका विभिन्न संघसंस्थाले मलेसियास्थित नेपाली दूतावाससमक्ष समस्यामा परेका नेपालीलाई स्वदेश फर्काउन आग्रह गरिरहेका छन् ।
यता मलेसियास्थित नेपाली दूतावासले मलेसियाबाट स्वदेश फर्कन चेक आउट मेमो लिइसकेका तर उडान बन्द हुँदा रोकिएकाहरू उडान खुलेपछि सजिलै स्वदेश फर्कन सक्ने बताएको छ । मलेसियामा रहेको नेपाली दूतावासले फेसबुक लाइभमार्फत चेक आउट मेमो लिइसकेर पनि उडान बन्द हुँदा स्वदेश फर्कन नपाएकाहरू उडान खुलेपछि सजिलै जान सक्ने बताएको छ ।
कोरोना संक्रमण रोकथामका लागि सरकारले उडान बन्द गर्दा घर फर्कन चेक आउट मेमो लिएर पनि फर्कन नपाएको अवस्था छ । चेक आउट मेमोको मिति सकिए पनि उडान बन्द भएको कारण रोकिएकाहरू उडान खुलेपछि पुरानै चेक आउट मेमोमार्फत नै स्वदेश फर्कन सकिने दूतावासले जनाएको छ ।
यस्तै दूतावासका अनुसार, भिसा सकिएका श्रमिकले कम्पनीसँग अनुरोध गरेर स्पेसल पास पनि बनाउन सक्नेछन् । भिसा सकिएको छ तर घर फर्किने चेक आउट मेमो लिएको छैन भने पनि कम्पनीसँग अनुरोध गरी पास लिन सकिन्छ । सरकारले चीन, कतार र टर्कीका लागि सातामा एक दिन नियमित उडान खोल्ने निर्णय गरेपनि मलेसिया र नेपालबीच उडान शुरु गरिएको छैन । जसका कारण भिसा अवधि पूरा गरेर स्वदेश फर्किन तयार रहेका हजारौँ नेपाली उडान नहुँदा अलपत्र परेका छन् ।
कतारमा असार एक गतेबाट मागपत्र प्रमाणीकरण
कतारस्थित नेपाली दूतावासले आगामी असार एक गतेबाट मागपत्र प्रमाणीकरण गर्ने भएको छ । दूतावासले शुक्रबार एक सूचना जारी गर्दै आगामी असार एक गतेदेखि बिहान ८ बजेदेखि ११ बजेसम्म मागपत्र प्रमाणीकरण गर्ने जनाएको हो । दूतावासले सार्वजनिक बिदा बाहेक शुक्रबारदेखि बिहीबार खुला रहने बताएको छ ।
सरकारले अनुमति दिएपछि काठमाडौं र दोहाबीच जुन ७ देखि नेपाल एयरलाइन्स र कतार एअरवेजलाई साताको एक÷एक उडान शुरु भएको छ । उक्त अनुमतिपछि वैदेशिक रोजगार कार्यालय काठमाडौं ताहाचलले आइतबार र बुधबार गरी हप्तामा दुई दिन श्रम स्वीकृति दिन शुरु गरेको छ । त्यसपछि अभिमुखीकरण तालिम दिने संस्थाहरु पनि सक्रिय भएका छन् ।
ओमानमा दूतावासको घुम्ती सेवा
ओमानमा रहेको नेपाली दूतावासले त्यहाँ रहेका नेपाली श्रमिकको सहजताको लागि घुम्ती सेवा दिने भएको छ । आउँदो जुन १५ अर्थात् असार ११ गते ओमानको दोफार प्रशासनिक क्षेत्रमा बिहान ११ देखि बेलुकी पाँच बजेसम्म घुम्ती सेवा दिन लागिएको ओमानमा रहेको नेपाली दूतावासले जनाएको छ । कोरोना महामारीका कारण अप्ठ्यारो परिस्थिति सिर्जना हुँदा भिसा, राहदानी नवीकरण लगायतका सेवा लिन नपाएका श्रमिकलाई उनीहरुकै क्षेत्रमा गएर सेवा प्रवाह गरिन लागिएको हो ।
बारेसानामा लगायत अत्यावश्यक कन्सुलर सेवा पनि प्रदान गरिने दूतावासले जनाएको छ । यी सेवाहरु लिनको लागि आवश्यक कागजात तथा दस्तुर सम्बन्धी विवरणबारे दूतावासको वेबसाइट जततउकःररयm।लभउबझिदबककथ।नयख।लउ मा गएर बुझ्न सकिने दूतावासले जनाएको छ । दूतावासका अनुसार दोफार प्रशासनिक क्षेत्रको सलालामा घुम्ती सेवा प्रदान गरिने भए पनि उपयुक्त स्थान पछि तोकिने छ । घुम्ती सेवाका लागि ९२०७५०७१ वा दूतावासको हटलाइन नम्बर ७१५९२४९० मा फोन गरेर पनि बुझ्न सकिनेछ ।