कोरोना सम्बन्धमा अनावश्यक टिप्पणी नगर्न स्वास्थ्य मन्त्रालयको आग्रह

काठमाडौँ(जस)– स्वास्थ्य तथा जनसङ्ख्या मन्त्रालयले कोभिड–१९ को महामारीका सम्बन्धमा अनाधिकृत व्यक्तिले अनावश्यक बोल्न र टिप्पणी नगर्न अनुरोध गरेको छ । मन्त्रालयका प्रवक्ता डा कृृष्णप्रसाद पौडेलले मंगलबार सूचना जारी गर्दै जनस्वास्थ्यका विषयमा असम्बन्धित निकायले आमसञ्चारमाध्यममा बोल्ने र टिप्पणी नगर्न आग्रह गरेका हुन् ।
यस्ता गतिबिधिले धेरैलाई द्विबिधा र भ्रमित बनाउने गरेकाले यस्तो कार्य नगर्न विज्ञप्तिमा भनिएको छ । ‘कोभिड–१९ का सम्बन्धमा समग्र जनस्वास्थ्यका बिषयमा विभागीय मन्त्री वा मन्त्रालयले तोकेका पदाधिकारी र निकाय वाहेकले आधिकारिक जानकारी वा पुष्ट््याइ गर्ने कार्यलाई रोकिदिन प्रधानमन्त्री तथा मन्त्रिपरिषद्को कार्यालयलाई अनुरोध गरी पठाउने र सार्वजनिक रुपमा सवैलाई अनुरोध गर्ने’ सूचनामा उल्लेख छ । मन्त्रालयले अनाधिकृत सूचना तथा जानकारी प्रकाशन प्रसारण गर्न नगराउन अनुुरोध समेत गरेको छ ।
नेपालमा पछिल्ला दिनमा कोरोनाबाट संक्रमित हुनेभन्दा निको हुने बढेका छन् । मंगलबार स्वास्थ्य तथा जनसङ्ख्या मन्त्रालय दिएको जानकारी अनुसार पछिल्लो २४ घण्टामा ६ हजार ८९८ कोरोना संक्रमणमुक्त भइ घर फर्किएका छन् भने सोही अवधिमा ६ हजार ८५ मा संक्रमण पुष्टि भएको छ । स् का अनुसार देशभरका विभिन्न प्रयोगशालामा १७ हजार १४७ को पिसिआर र ३ हजार १८ जनाको एन्टिजेन परीक्षण गर्दा पिसिआर मार्फत ५ हजार २८५ र एन्टिजेन मार्फत ८०० संक्रमित पुष्टि भएको हो । यस्तै हाल देशभर एक लाख ४ हजार ७८९ सक्रिय संक्रमित छन । मन्त्रालयको अनुसार सोही अबधिमा देशभर ६८ संक्रमितको मृत्यु भएको छ । योसँगै कोरोनाबाट मृत्यु हुनेको सङ्ख्या ७ हजार ४५४ पुगेको छ । हालसम्म सङक्रमणमुक्त हुनेको सङ्ख्या ४ लाख ५४ हजार ३४४ छ ।
नेपालमा हाल सक्रिय कोरोना संक्रमितको संख्या एक लाख ५ हजार ५२१ पुगेका छन् । त्यस्तै अहिले देशभर संस्थागत आइसोलेसनमा ७ हजार ८५ जना रहेका छन् भने होम आइसोलेसनमा ९७ हजार ७०४ रहेका छन् । त्यस्तै अहिले नेपालमा १४९१ जना कोरोना संक्रमित आइसीयुमा उपचारत रहेका मध्ये ४०४ जनाको भेन्टिलेटरमा उपचार भइरहेको स्वास्थ्य मन्त्रालयले जनाएको छ । पछिल्लो २४ घण्टामा नेपालमा २० बर्ष मुनिका ६३० जनालाई कोरोना पुष्टि भएको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा १० बर्ष मुनिका १७४ जना र ११ देखि २० बर्षसम्मका ४५६ गरि २० बर्षमुनिका कुल ६३० जनामा कोरोना संक्रमण पुष्टि भएको छ । अहिले देखिएको कोरोनाको नयाँ भेरियन्ट बालबालिका र युवाहरुलाई बढी असर गरेको देखिएको स्वास्थ्य मन्त्रालयले जानकारी दिएको छ । पछिल्लो २४ घन्टामा २१ देखि ३० बर्ष उमेर समुहका १२१८ जना संक्रमित भएका छन् भने ३१ देखि ४० बर्षका ११८८ जना र ४१ देखि ५० बर्ष उमेर समुहका ८०४ जना संक्रमित भएका छन् । त्यस्तै ५१ देखि ६० बर्षसम्मका ७४२ जना, ६१ देखि ७० बर्षसम्मका ४१७ जना, ७१ देखि ८० बर्षसम्मका १८० जना, ८० बर्ष भन्दा माथिका ८८ जना र उमेर नखुलेका १८ जना रहेका छन् ।