यस वर्षपनि एसईई परीक्षा नहुने, नतिजा आन्तरिक मूल्यांकनबाट

काठमाडौं(जस)सरकारले यस वर्षको माध्यामिक शिक्षा परीक्षा (एसईई) पनि आन्तरिक मूल्यांकनबाट गर्ने भएको छ । आइतबार प्रधानमन्त्री निवास बालुवाटारमा बसेको मन्त्रिपरिषद् बैठकले आन्तरिक मूल्यांकनबाट परीक्षा लिएर सोहीअनुसार नतिजा प्रकाशित गर्ने निर्णय गरेको हो । शिक्षा, विज्ञान तथा प्रविधि मन्त्रालयले यसबारेको प्रस्ताव मन्त्रिपरिषदमा लगेको थियो ।
यसअघि परीक्षाको मोडालिटी तयार गर्न कार्यदल बनाइएको थियो । कोरोना भाइरस संक्रमणको अवस्थामा परीक्षाका विभिन्न विकल्प सुझाउँदै कार्यदलले राष्ट्रिय परीक्षा बोर्डका अध्यक्ष प्राडा चन्द्रमणि पौडेललाई प्रतिवेदन बुझाएको थियो भने बोर्डले मन्त्रालयमा पेश गरेको थियो । मन्त्रिपरिषद्ले एसईईबारे टुंगो लगाएपछि अब परीक्षा कसरी हुने भन्ने अन्योलता पनि हटेको छ । सरकारले कोरोनाकै कारण यसअघि तय गरेको परीक्षा स्थगित गरेको थियो । अब आन्तरिक मूल्यांकनबाट परीक्षा गर्न आवश्यक तयारी गरिनेछ । कोरोनाकै कारण अघिल्लो वर्षपनि आन्तरिक मूल्यांकनबाटै परीक्षाफल प्रकाशन गरिएको थियो ।