कतारस्थित नासर अल अली कम्पनीद्धारा नेपालीलाई पुरस्कार, नौ नेपालीले पाए जनही १५ हजार रियाल पुरस्कार

कतार(जस)– कतारस्थित नासर अल अली कम्पनीद्धारा नौ नेपाली कामदारलाई जनही १५ हजार रियाल पुरस्कार प्रदान गरेको छ । आइओएस प्रमाणित उक्त कम्पनीले आफ्ना नौ नेपाली कामदार चन्द्र धिमाल, चन्द्र महतो, गरीब दास, गोरे श्रेष्ठ, बेलबहादुर कामी, माहिकार चौधरी, राजकिशोर सिंह, राम बाबु दास र महेन्द्र मण्डल धानुकलाई रमजानको पवित्र महिनाको अवसरमा सो रकम प्रदान गरेको हो । कम्पनीमा १० वर्षभन्दा बढी आफ्नो समर्पण इमान्दारिता र उत्कृष्ट काम गरेवापत् जनही १५ हजार रियाल पुरस्कार प्रदान गरी नासर अली अल अली, कम्पनीका मालिक नासर अल अलीले एक कार्यक्रमकाबीच ती कामदारहरुलाई सो नगद हस्तान्तरण गर्दै सम्मानित गरेका थिए ।

प्राप्तकर्तामध्ये एक महेन्द्र मण्डल धानुक नेपालको सुदूर पूर्वी पहाडका हुन् । कतारको आम्दानीबाट उनी देशको पूर्वी पहाडमा रहेको शहरी क्षेत्रमा जमिन किन्न सफल भए र त्यहाँ नयाँ घर बनाए । अर्को पुरस्कार विजेता चन्द्र धिमाल आफ्ना बच्चाहरूलाई शिक्षित गर्न सक्षम भएका छन् । यस्तै चन्द्र महतो नेपालको गरिब परिवारबाट आएका कम्पनीमा सिकर्मीको रूपमा कार्यरत छन् । उनका अनुसार उनका मालिक अलीले उनलाई शिक्षामा लगानी गर्न प्रोत्साहित गरे र उनले आफ्नो तलब आफ्ना बच्चाहरूको शिक्षामा प्रयोग गरे ।

अर्को कामदार गोरे श्रेष्ठ कन्स्ट्रक्सन कामदारको रुपमा आएका निम्न पारिवारिक पृष्ठभुमिका श्रेष्ठ अहिले ट्रेडमा काम गर्नसक्ने दक्ष कामदार भइसकेका छन् । यस्तै बेलबहादुर कामी आफ्नो काम, पारिश्रमिक र घरेलु वातावरणमा सन्तुष्ट छन् । २०१० मा कतार अवतरित भएका माहिकार चौधरी नेपालको गरिब परिवारका हुन् । नासर अल अली इन्टरप्राइजेजमा आफुले काम गरेर आफनो आर्थिक सुधार गर्न सकेको बताउने चौधरी कम्पनीको मालिक आफुहरुको अविभावक भएको बताउँछन् । राज किशोर सिंह पनि आफ्नो पुरस्कारको पैसा आफ्ना बच्चाहरूको शिक्षाको लागि प्रयोग गर्न चाहन्छन् । रामबाबु दास पुरस्कार पाउँदा खुसी भएका उनले भविष्यमा राम्रो जीवनको लागि यो पैसा बचाउन चाहेको बताए । अर्का कर्मचारी गरीब दासले आफ्नो कम्पनीका मालिक नासर अल अलीले सधै परिवारका सदस्यहरू झैं व्यवहार गर्ने गरेको बताउँदै उनको प्रशंसा गरे ।

कम्पनीका मालिक नासर अली अल अलीले आफनो कम्पनीमा काम गरिरहेका कामदारहरुलाई उनीहरुको इमान्दारिता, लगनशीलता र योगदानको मुल्यांकन गर्दै पुरस्कार दिन पाउँदा आफुलाई खुशी लागेको बताए । ‘उनीहरुको योगदान आफनो कम्पनीमा प्रशंसनीय रहेको छ । कम्पनीले आर्जन गरेको रकमबाट यसरी कामदारहरुलाई समयसमयमा पुरस्कृत गर्न पाउदा कम्पनी र कामदारको वीचमा सम्बन्ध गाढा हुने र कामदारहरुपनि प्रोत्साहित हुन्छन’, अलीले भने । आफ्ना कामदारहरुले वफादारी र कडा परिश्रमले कम्पनीको सफलतामा समेत ठुलो योगदान पुर्याएको बताउँदै उनले सबै कामदारहरुको कामको सराहना गरे । ‘यो सबै कामदारहरुको उत्साहको टोकनस्वरुप हो । सबै कामदार तथा कर्मचारीहरूले आगामी दिनमा अझ बढी योगदान दिने र उनीहरुले पनि सफलताहरू प्राप्त गर्दै जाने छन् भन्ने कुरामा म विश्वस्त छु’, अलीले बताए ।