च्याम्पियन्स लिग फुटबल, एटलान्टा क्वार्टरफाइनलमा, टोट्टनहाम बाहिररियो

काठमाडौं(एजेन्सी)–स्ट्राईकर जोसिप इलिसिसको ह्याट्रिकसहित चार गोल गरेपछि इटालियन क्लब एटलान्टा पहिलो पटक च्याम्पियन्स लिग फुटबको क्वार्टरफाइनलमा प्रवेश गरेको छ । मंगलबार राति भएको दोस्रो लेगमा एटलान्टाले स्पेनिस प्रतिद्वन्द्वी भ्यालेन्सियालाई ४–३ गोलले हरायो । पहिलो लेगमा ४–१ गोलको जित निकालेको एटलान्टा समग्रमा ८–४ गोलले विजयी भयो । एटलान्टाको जितमा चारवटै गोल जोसिस इलिसिसले गरे । घरेलु मैदानमा भ्यालेन्सियाका लागि केभिन गेमेरियोले दुई र फेरान टोरेसले एक गोल गरेपनि टोलीको हार टार्न सकेनन् ।
प्रतिस्पर्धात्मक खेलमा एटलान्टाले खेलको तेस्रो मिनेटमै पेनाल्टी मार्फत अग्रता लिएको थियो । डिबक्सभित्र भ्यालेन्सियाका माउक्टर डिएकहवीले इलिसिलाई लडाएपछि एटलान्टाले पेनाल्टी पाएको थियो । उक्त पेनाल्टीलाई इलिसिस आफैले सदुपयोग गरे । २१औं मिनेटमा केभिन गेमेरियोले गोल गर्दै खेललाई बराबरीमा ल्याए ।
४३औं मिनेटमा इलिसिसले पेनाल्टीमा गोल गर्दै एटलान्टालाई पुनः अग्रता दिलाए । ५१औं मिनेटमा गेमेरियोले बराबरी गोल फर्काए । ६७औं मिनेटमा फेरान टोरेसले गोल गर्दै भ्यालेन्सियालाई अग्रता दिलाए । त्यसपछि एटलान्टाको जोसिस इलिसिसले ७१औं मिनेटमा ह्याट्रिक पूरा गरे । इलिसिसले ८२औं मिनेटमा ब्यक्तिगत चौथो गोल गर्दै टालीलाई सजिलै क्वार्टरफाइनलमा पुर्याए ।
टोट्टनहाम च्याम्पियन्स लिगबाट बाहिरियो
टोट्टनहाम युइएफए च्याम्पियन्स लिग फुटबलको प्रिक्वार्टरफाइनलबाटै बाहिरिएको छ । मङ्गलबार राति भएको खेलमा साविक उपविजेता टोट्टनहाम जर्मन प्रतिद्वन्द्वी आरबी लइपजिगसँग ३–० गोलले पराजित भयो । जित्नै पर्ने खेलमा टोट्टनहामले विर्सनलायक प्रदर्शन गरेको थियो । पहिलो लेगमा १–० को जित निकालेको लेइपजिग समग्रमा ४–० ले विजयी भयो ।
घरेलु मैदानमा लेइपजिगलाई जिताउन मार्सेल सवित्जरले दुई तथा इमिल फोर्सवर्गले एक गोल गरे । १०औं मिनेटमा मार्सेल सवित्जरले गोल गर्दै घरेलु टोलीको उत्साह जगाए । २१औं मिनेटमा सवित्जरले हेड गोल गर्दै टोलीको अग्रता दोब्बर बनाए । ८७औं मिनेटमा इमिल फोर्सवर्गले गोल गर्दै लेइपजिगको क्वार्टरफाइनल यात्रा सहज बनाएका थिए । दोस्रो हाफका दुईवटा उत्कृष्ट गोलको अवसर बनाएप्नि टोट्टनहामको प्रयास सफल हुन सकेन ।