नयाँ कार्यसमिति चयनको तयारीमा नेपाल लोकतान्त्रिक वैदेशिक रोजगार व्यवसायी फोरम, माघ २४ गते साधारणसभा सहितको निर्वाचन तय

काठमाडौं(जस)–नेपाल लोकतान्त्रिक वैदेशिक रोजगार व्यवसायी फोरमले आगामी दुइ वर्षका लागि नयाँ कार्यसमितिको चयन प्रक्रिया थालेको छ । फोरमको विस २०७७ भाद्रसम्म वर्तमान कार्यसमितिको म्याद बाँकी रहेपनि अध्यक्ष र सचिवको पद रिक्त भैसकेको तथा कार्यवाहक अध्यक्ष र उपाध्यक्षलगायत ५ जना गत वैदेशिक रोजगार व्यवसायी संघको निर्वाचनमा निर्वाचित भएकोले फोरममा नयाँ कार्यसमिति चयनको कार्य शुरु भएको हो ।

‘एउटै व्यक्तिको दुइवटा कार्यभार निष्प्रभावी हुँदा संस्थागत कार्यसम्पादन प्रभावकारी हुन नसकेको निष्कर्षमा कार्यसमिति पुगेको छ’ महासचिव तारानाथ अर्यालले जनसवालसँगको कुराकानीमा बताए । यसै सन्दर्भमा लोकतान्त्रीक फोरमको कार्य समिति, पूर्व अध्यक्ष एवं सल्लाहकार सहितको संयुक्त वैठकले मिति २०७६ माघ २४ गते शुक्रवारका दिन साधारणसभा सहितको निर्वाचनमा जाने निर्णयसमेत गरेको छ ।

सो निर्वाचन प्रयोजनका लागि पुराना सदस्य संस्थाहरुलाई आ–आफ्नो सदस्यता नविकरण गर्न र नयाँ व्यवसायिक संस्थाहरुलाई नयाँ सदस्यता लिनका लागि समय सीमा राखि सूचना मार्फत जानकारी गराइने फोरमले जानकारी दिएको छ । ‘यस कार्यका लागि सम्पूर्ण लोकतान्त्रिक पक्षधर व्यवसायीहरुलाई क्रियासिल बनाउने कार्य शुरु भइसकेको छ’, महासचिव अर्यालले बताए ।
फोरम नेपाली कांग्रेसको शुभेच्छुक संस्थाका रुपमा रहेको छ ।