राप्रपाद्धारा सरकारको निर्णयको स्वागत

काठमाडौँ(जस)–राष्ट्रिय प्रजातन्त्र पार्टीले २२ बुँदे माग राख्दै आन्दोलन गरिरहेकामा सरकारले उक्त पार्टीलाई यही वैशाख १० गते वार्तामा बोलाएकामा पार्टीले त्यसको स्वागत गरेको छ । कानून, न्याय तथा संसदीय मामिलामन्त्री भानुभक्त ढकालले सरकारकोतर्फबाट आइतबार पत्र पठाएका थिए । सरकारको पहलकदमीलाई पार्टीले सकारात्मकरुपमा लिएको जनाएको छ ।
गत फागुन ७ गते सरकारसमक्ष पेश गरेको हिन्दू राष्ट्रको पुनःस्थापना, राजासहितको लोकतन्त्रका लागि सर्वपक्षीय गोलमेच सम्मेलन, सङ्घीयताबारे जनमतसङ्ग्रहलगायत मागका विषयमा छलफल गर्न यही वैशाख १० गतेका लागि वार्तामा आमन्त्रण गरिएको छ । सरकारसँग वार्ता गर्न पार्टीले नेता दीपक बोहराको संयोजकत्वमा महामन्त्री राजेन्द्र लिङ्देन र नेता नीरञ्जन थापासहित तीन सदस्यीय वार्ता समिति गठन गरेको छ ।