लुम्बिनी प्रदेश मन्त्री र सांसदमाथि जसपाको कारवाही, चार जना पार्टीबाट निष्काशित

-इमरान खान
भैरहवा । जनता समाजवादी पार्टी, नेपाल (जसपा) ले पार्टीको नीति, निर्णय र निर्देशनविपरीत काम गरेको आरोपमा लुम्बिनी प्रदेशका मन्त्री तथा प्रदेशसभा सदस्यहरूमाथि कडा कारबाही गरेको छ।

पार्टी निर्देशनविपरीत लुम्बिनी प्रदेशका मुख्यमन्त्री चेतनारायण आचार्यलाई विश्वासको मत दिएको भन्दै जसपाले मन्त्री सन्तोषकुमार पाण्डेयसहित हेमा बेल्वासे (के.सी.), भण्डारीलाल अहिर र आदेशकुमार अग्रवाललाई पार्टीबाट निष्काशन गरेको हो।

पार्टीको निर्णयविपरीत मुख्यमन्त्रीलाई विश्वासको मत दिनु गम्भीर अनुशासन उल्लंघन भएको निष्कर्ष निकाल्दै जसपाले चारै जनामाथि निष्काशनको कारबाही गरेको जनाएको छ।

यस कारबाहीसँगै लुम्बिनी प्रदेशको राजनीतिमा नयाँ तरंग पैदा भएको छ भने मन्त्री तथा प्रदेशसभा सदस्यको पद र आगामी राजनीतिक समीकरणमाथि समेत चासो बढेको छ।