एनआरएनएको १२औँ महाधिवेशनका लागि कतारमा सदस्यता दर्ता सुरु

दोहा(जस)–गैरआवासीय नेपाली संघ (एनआरएनए) राष्ट्रिय समन्वय परिषद् कतारले आगामी १२औँ अन्तर्राष्ट्रिय महाधिवेशन तथा निर्वाचनका लागि सदस्यता दर्ता खुला गर्दै कतारमा रहेका सम्पूर्ण नेपालीलाई सहभागिताका लागि आह्वान गरेको छ । संघका महासचिव विवेक पुलामी मगरले एक सूचना जारी गर्दै आगामी २३ देखि २५ फेब्रुअरी २०२६ सम्म आयोजना हुने महाधिवेशनलाई लक्षित गरी सदस्यता दर्ता प्रक्रिया सुरु भएको जानकारी दिएका हुन् ।
यस पटकको निर्वाचन र सदस्यता प्रणालीलाई विगतको तुलनामा थप पारदर्शी, सुरक्षित र व्यवस्थित बनाउन एनआरएनए अन्तर्राष्ट्रिय समन्वय परिषद्ले नयाँ प्रविधि अवलम्बन गरेको छ । यसअघि प्रयोगमा रहेका हाई लेभल कमिटी पोर्टल, मेम्बर इन्फर्मेसन सिस्टम र विभिन्न देशका राष्ट्रिय परिषद्का पोर्टलहरूलाई एकीकृत गरी अहिले ‘मेम्बर्स रजिष्ट्रेसन सिस्टम’ सञ्चालनमा ल्याइएको छ । यही नयाँ प्रणालीमार्फत विश्वभरका गैरआवासीय नेपालीले आफ्नो विवरण प्रमाणीकरण गर्ने र नयाँ सदस्यता लिने व्यवस्था मिलाइएको छ ।
कतारमा कार्यरत रहेका र अहिलेसम्म सदस्यता लिन छुटेका गैरआवासीय नेपालीहरूले आगामी १६ जनवरी २०२६ भित्र अनिवार्य रूपमा सदस्यता दर्ता गरिसक्नुपर्ने सूचनामा उल्लेख छ । सदस्यता दर्ताका लागि मोबाइल प्रयोगकर्ताले एन्ड्रोइड र आईओएस दुवै प्लेटफर्ममा उपलब्ध एप प्रयोग गर्न सक्नेछन् । तोकिएको समयभित्र सदस्यता दर्ता गरेमा मात्र १२औँ अन्तर्राष्ट्रिय महाधिवेशन र निर्वाचनमा सहभागी हुन पाइने सुनिश्चितता गरिएको छ । महासचिव मगरले कतारमा स्थापित विभिन्न संघ–संस्थाका प्रमुख, अभियन्ता, व्यवसायी, कलाकार, पत्रकारलगायतलाई यो अवसर नगुमाउन आग्रह गरेका छन् । आपसी एकता र सहकार्यमार्फत ऐतिहासिक महाधिवेशनलाई सफल बनाउन अपिल गर्दै संघले कतारमा रहेका सम्पूर्ण गैरआवासीय नेपालीको सक्रिय सहभागिताको अपेक्षा समेत गरेको छ ।