बाढीपीडितका लागि राहत सामग्री ढुवानीमा नेपाल वायुसेवाको शुल्क छुट

काठमाडौं(जस)–नेपाल वायुसेवा निगमले बाढी तथा प्राकृतिक विपद्बाट प्रभावित नागरिकका लागि पठाइने राहत सामग्रीको ढुवानीमा लाग्ने शुल्कमा विशेष छुट दिने निर्णय गरेको छ । निगमले आफ्नो संस्थागत सामाजिक उत्तरदायित्वअन्तर्गत अन्तर्राष्ट्रिय गन्तव्यबाट नेपालमा बाढीपीडितका लागि पठाइने राहत सामग्री ढुवानीमा लाग्ने सम्पूर्ण शुल्क एक महिनाका लागि पूर्ण रूपमा छुट गर्ने निर्णय गरेको हो ।
निगमका अनुसार सम्बन्धित दूतावाससँग समन्वय गरी दूतावासको आधिकारिक पत्रका आधारमा बाढीपीडितका लागि पठाइने खाद्यान्न, औषधि, लत्ताकपडा तथा अन्य आवश्यक राहत सामग्री ढुवानीमा यस्तो छुट प्रदान गरिनेछ । विपद्को समयमा मानवीय सहयोगलाई सहज र प्रभावकारी बनाउन निगमले यस्तो निर्णय गरेको जनाएको छ ।
यसबाट विभिन्न मुलुक तथा संघसंस्थाबाट नेपालमा पठाइने राहत सामग्री प्रभावित समुदायसम्म छिटो पु¥याउन सहयोग पुग्ने अपेक्षा गरिएको छ । निगमले विपद्का बेला राहत तथा मानवीय सहयोगलाई प्राथमिकता दिँदै प्रभावित नागरिकसम्म सहयोग पु¥याउन आफ्नो तर्फबाट सहजीकरण गर्ने जनाएको छ । नेपाल वायुसेवा निगमले जारी गरेको प्रेस नोटमा उक्त निर्णय एक महिनाका लागि लागू हुने उल्लेख गरिएको छ ।