रास्वपाको सभापतिमा निर्विरोध निर्वाचित रवि लामिछानेले लिए शपथ

चितवन,राष्ट्रिय स्वतन्त्र पार्टी (रास्वपा) का सभापतिमा निर्विरोध निर्वाचित भएका रवि लामिछाने ले पद तथा गोपनीयताको शपथ ग्रहण गरेका छन्। चितवनमा सम्पन्न पार्टीको प्रथम राष्ट्रिय महाधिवेशनपछि आयोजित कार्यक्रममा केन्द्रीय निर्वाचन आयोगका अध्यक्ष भुवन केसी ले लामिछानेलाई शपथ ग्रहण गराएका हुन्।
गत असार ७ गतेदेखि १२ गतेसम्म चितवनमा सम्पन्न महाधिवेशनबाट लामिछाने सभापतिमा निर्विरोध निर्वाचित भएका थिए। पार्टी स्थापनापछि पहिलो पटक आयोजित महाधिवेशनले नयाँ नेतृत्व चयन गर्दै आगामी संगठनात्मक तथा राजनीतिक यात्राको दिशा तय गरेको रास्वपाले जनाएको छ।
शपथ ग्रहणपछि सभापति लामिछानेले आफूलाई पुनः नेतृत्वको जिम्मेवारी सुम्पिएकोमा पार्टीका नेता, कार्यकर्ता, प्रतिनिधि तथा शुभेच्छुकप्रति आभार व्यक्त गर्दै जनताले रास्वपामाथि राखेको विश्वासलाई कुनै पनि हालतमा कमजोर हुन नदिने प्रतिबद्धता जनाए।
उनले भने, “यो पद सम्मानभन्दा बढी जिम्मेवारी हो। महाधिवेशनले ममाथि राखेको विश्वासलाई जनताको विश्वासमा रूपान्तरण गर्ने काम अब हाम्रो सामूहिक दायित्व हो। रास्वपाले सुशासन, पारदर्शिता, जवाफदेहिता र राजनीतिक संस्कारको पक्षमा उठाएका एजेन्डाबाट हामी पछि हट्ने छैनौँ।”
लामिछानेले पार्टीभित्रको एकता, अनुशासन र लोकतान्त्रिक अभ्यासलाई अझ सुदृढ बनाउँदै जनताको अपेक्षाअनुसार काम गर्ने प्रतिबद्धता पनि व्यक्त गरे। उनले रास्वपाले वैकल्पिक राजनीतिक शक्तिका रूपमा आफूलाई स्थापित गरिसकेको उल्लेख गर्दै अब जनविश्वासलाई परिणाममुखी काममार्फत थप मजबुत बनाउने बताए।
उनका अनुसार महाधिवेशनले केवल नयाँ नेतृत्व चयन गर्ने काम मात्र नगरी पार्टीलाई संस्थागत, व्यवस्थित र देशव्यापी रूपमा विस्तार गर्ने स्पष्ट मार्गचित्र पनि तय गरेको छ। उनले सबै नेता तथा कार्यकर्तालाई व्यक्तिगत स्वार्थभन्दा माथि उठेर पार्टीको साझा उद्देश्य पूरा गर्न एकजुट हुन आग्रह गरे।
चितवनमा सम्पन्न छदिने महाधिवेशनमा देशभरबाट आएका प्रतिनिधिहरूको सहभागिता रहेको थियो। महाधिवेशनले केन्द्रीय नेतृत्व चयनसँगै संगठन सुदृढीकरण, वैचारिक स्पष्टता र आगामी राजनीतिक कार्यदिशाबारे समेत महत्वपूर्ण निर्णय गरेको रास्वपाले जनाएको छ।
शपथ ग्रहणसँगै लामिछानेले औपचारिक रूपमा दोस्रो कार्यकालका लागि सभापतिको जिम्मेवारी सम्हालेका छन्। अब नवनिर्वाचित नेतृत्वले महाधिवेशनबाट पारित नीति, कार्यक्रम र संगठन विस्तारका योजनालाई कार्यान्वयनमा लैजाने तयारी अघि बढाएको छ।