एफएनसीसीआईमा अन्जन श्रेष्ठको दबदबा, ढकाल समूहको साख धराशायी,वरिष्ठ उपाध्यक्षदेखि कोषाध्यक्षसम्म अध्यक्ष श्रेष्ठ प्यानलको क्लिन स्वीप, महासंघको शक्ति समीकरणमा ठूलो उलटफेर

काठमाडौं,नेपाल उद्योग वाणिज्य महासंघ (एफएनसीसीआई) को शुक्रबार सम्पन्न निर्वाचनले महासंघभित्रको शक्ति समीकरण पूर्ण रूपमा बदलिएको संकेत दिएको छ । अध्यक्ष अन्जन श्रेष्ठले बनाएको रणनीतिक टिमले वरिष्ठ उपाध्यक्ष र कोषाध्यक्ष दुवै पदमा प्रभावशाली जित निकाल्दै महासंघमा आफ्नो बलियो नियन्त्रण स्थापित गरेको छ भने निवर्तमान अध्यक्ष चन्द्र प्रसाद ढकाल समूह भने नराम्ररी कमजोर बनेको देखिएको छ ।
महासंघको भावी अध्यक्ष मानिने वरिष्ठ उपाध्यक्ष पदमा अध्यक्ष श्रेष्ठ समर्थित सुरकृष्ण वैद्य विजयी भए । वैद्यले ५६ मत प्राप्त गर्दा प्रतिस्पर्धी रामचन्द्र सांघाई ३० मतमै सीमित भए । चुनावअघि नै महासंघभित्र ‘निर्णायक भिडन्त’का रूपमा हेरिएको यो प्रतिस्पर्धामा वैद्यले सहज अन्तरले जित निकाल्नु अन्जन श्रेष्ठ समूहको संगठित शक्ति प्रदर्शनका रूपमा हेरिएको छ ।
त्यस्तै कोषाध्यक्ष पदमा पनि अध्यक्ष श्रेष्ठ प्यानलले एकतर्फी जित निकाल्यो । मनिषलाल प्रधानले ६१ मत प्राप्त गर्दै विजयी हुँदा प्रतिस्पर्धी अम्बिका प्रसाद पौडेलले केवल २५ मत प्राप्त गरे । मत परिणामले महासंघभित्र अहिले कसको प्रभाव बलियो छ भन्ने स्पष्ट चित्र देखाएको टिप्पणी व्यवसायी वृत्तमा सुरु भएको छ ।
निर्वाचन परिणामसँगै महासंघभित्र सबैभन्दा बढी चर्चा भने निवर्तमान अध्यक्ष चन्द्रप्रसाद ढकाल समूहको कमजोर उपस्थितिको भइरहेको छ । केही वर्षअघिसम्म महासंघमा निर्णायक प्रभाव राख्ने ढकाल समूह यसपटक भने आफ्ना समर्थित उम्मेदवारलाई जिताउन पूर्ण रूपमा असफल देखियो । महासंघका धेरै प्रतिनिधिले खुला रूपमा अन्जन श्रेष्ठ नेतृत्वलाई साथ दिएपछि ढकाल समूहको पकड खुकुलो बन्दै गएको विश्लेषण गरिएको छ ।
महासंघभित्रको आन्तरिक राजनीतिमा प्रभावशाली मानिने समूहहरूको समर्थनसमेत यसपटक अध्यक्ष श्रेष्ठतर्फ ढल्किएको देखिएको छ । चुनावअघि विभिन्न तहमा भएको समन्वय, रणनीतिक टिम व्यवस्थापन र मतदातासँगको निरन्तर संवादले श्रेष्ठ समूहलाई निर्णायक लाभ पुगेको महासंघ स्रोतको दाबी छ ।
विशेषगरी वरिष्ठ उपाध्यक्ष पदको नतिजालाई आगामी महासंघ नेतृत्वको दिशासँग जोडेर हेरिएको छ । महासंघको परम्पराअनुसार वरिष्ठ उपाध्यक्ष नै भावी अध्यक्ष बन्ने अभ्यास रहेकाले सुरकृष्ण वैद्यको जितले अब आगामी नेतृत्वको मार्ग लगभग तय भएको सन्देशसमेत दिएको छ ।
उता, लगातार चुनावी हारपछि ढकाल समूहभित्र नै अब रणनीति र नेतृत्व शैलीबारे समीक्षा सुरु हुने संकेत देखिएको छ । महासंघमा लामो समय प्रभाव कायम राखेको समूह यसपटक मतदातालाई आफ्नो पक्षमा तान्न असफल भएपछि त्यसलाई ‘प्रभाव क्षयीकरण’को संकेतका रूपमा हेरिएको छ ।
निर्वाचन परिणाम सार्वजनिक भएसँगै महासंघभित्र अब अन्जन श्रेष्ठ समूहको निर्णायक कमाण्ड स्थापित भएको चर्चा व्यवसायिक क्षेत्रभर फैलिएको छ । निजी क्षेत्रका एजेन्डा, सरकारसँगको सम्बन्ध, लगानी वातावरण र महासंघको आगामी नीतिगत दिशामा अब यही समूहको प्रभाव अझ बलियो हुने अनुमान गरिएको छ ।