एलओडी क्लब विश्वकै टप ४० मा, ठमेलबाट विश्व संगीत नक्सामा नेपालको पहिचान

काठमाडौं, काठमाडौँको ठमेलस्थित LOD Club (लर्ड अफ द ड्रिन्क्स–एलओडी) ले सन् २०२६ का लागि सार्वजनिक विश्वका उत्कृष्ट १०० डिजे क्लबहरूको सूचीमा ४०औँ स्थान हासिल गर्दै नेपालको रात्रिकालीन मनोरञ्जन क्षेत्रलाई अन्तर्राष्ट्रिय स्तरमा स्थापित गर्ने महत्वपूर्ण उपलब्धि हात पारेको छ।
बेलायतको प्रतिष्ठित संगीत म्यागजिन DJ Mag ले हरेक वर्ष विश्वभरका चर्चित क्लबहरूबीच प्रतिस्पर्धा गराई ‘टप १०० क्लब्स’ सूची सार्वजनिक गर्ने गर्दछ। यस वर्ष ५०० भन्दा बढी क्लब सहभागी भएको प्रतिस्पर्धामा एलओडीले अघिल्ला वर्षहरूको तुलनामा सुधार गर्दै ४०औँ स्थानमा आफूलाई उकास्न सफल भएको हो।
एलओडीको यो यात्रा क्रमिक उकालोको उदाहरण बनेको छ। सन् २०२२ मा ५२औँ स्थानबाट सुरु भएको उकालो २०२३ मा ४९औँ, २०२४ मा ५०औँ, २०२५ मा ४४औँ हुँदै यस वर्ष ४०औँ स्थानसम्म पुगेको छ। निरन्तर सुधारले क्लबको व्यवस्थापन, सेवा गुणस्तर र अन्तर्राष्ट्रिय स्तरको प्रस्तुति मजबुत हुँदै गएको संकेत गर्छ।
क्लबका निर्देशक भुपेन कुँवरका अनुसार, यो उपलब्धि एउटा निजी संस्थाको सफलता मात्र नभई नेपालको सांगीतिक पहिचानसँग जोडिएको विषय हो। “एलओडीको स्थान उक्लिनु भनेको नेपाललाई विश्व संगीत र मनोरञ्जन उद्योगमा चिनाउने अवसर हो,” उनले भने, “यसले अन्तर्राष्ट्रिय पर्यटक र क्लब संस्कृति पछ्याउने युवालाई नेपालतर्फ आकर्षित गर्छ।”
ठमेल, जुन काठमाडौंको प्रमुख पर्यटकीय केन्द्र हो, त्यहीँबाट सञ्चालन भइरहेको एलओडीले पछिल्लो समय ‘नाइटलाइफ डेस्टिनेसन’ को रूपमा नेपालको छवि निर्माण गर्न महत्वपूर्ण भूमिका खेलेको छ। अन्तर्राष्ट्रिय डिजेहरूको नियमित प्रस्तुति, अत्याधुनिक साउण्ड र लाइटिङ सिस्टम, तथा व्यवस्थापनको व्यावसायिकता एलओडीलाई विश्वस्तरको क्लबको सूचीमा उभ्याउने प्रमुख आधार बनेका छन्।
पर्यटन व्यवसायीहरूका अनुसार, नेपालमा पर्यटन प्रायः हिमाल, संस्कृति र धार्मिक गन्तव्यमा सीमित रहँदै आएको थियो। तर एलओडीजस्ता संस्थाहरूको उदयसँगै ‘रात्रिकालीन अर्थतन्त्र’ (Night Economy) को अवधारणा विस्तार हुँदै गएको छ। यसले पर्यटकको बसाइ अवधि बढाउने, खर्च क्षमता वृद्धि गर्ने र सहरको आर्थिक गतिविधि चौबिसै घण्टा चलायमान बनाउने सम्भावना बोकेको छ।
एलओडीको अन्तर्राष्ट्रिय मान्यता नेपालका लागि ‘सफ्ट पावर’ को रूपमा पनि महत्वपूर्ण मानिएको छ। संगीत, मनोरञ्जन र युवा संस्कृतिमार्फत देशको पहिचान विस्तार गर्ने माध्यमका रूपमा यसलाई हेर्न थालिएको छ।
कुँवरका अनुसार, क्लबले अब अन्तर्राष्ट्रिय मापदण्डअनुसार थप स्तरोन्नति गर्दै नयाँ अनुभव प्रदान गर्ने योजना बनाएको छ। “यो उपलब्धिले हामीलाई थप जिम्मेवार बनाएको छ। अब लक्ष्य केवल सूचीमा रहनु होइन, अझ माथि उक्लिनु हो,” उनले स्पष्ट पारे।
समग्रमा, एलओडी क्लबको यो सफलता केवल एक व्यवसायिक उपलब्धि होइन, यसले नेपालको पर्यटन, संगीत र शहरी संस्कृतिलाई विश्व बजारमा चिनाउने एउटा सशक्त प्लेटफर्मको रूपमा आफूलाई स्थापित गरेको देखिन्छ।