रुपन्देही–३ उपनिर्वाचनमा रास्वपाबाट डा. लेखजंग थापा उम्मेदवार

काठमाडौं(जस)–रुपन्देही–३ मा हुन लागेको प्रतिनिधिसभा सदस्य उपर्वाचनमा राष्ट्रिय स्वतन्त्र पार्टी (रास्वपा) बाट वरिष्ठ न्युरोलोजिस्ट डा. लेखजंग थापा उम्मेदवार हुने भएका छन् । पार्टीका कार्यवाहक सभापति डोलप्रसाद अर्यालले आइतबार थापालाई चुनाव चिह्न ‘घण्टी’ प्रदान गर्दै उम्मेदवारीको औपचारिक घोषणा गरेका हुन् । रुपन्देहीको सिद्धार्थनगर–९, अञ्चलपुरमा जन्मिएका डा. थापा पार्टीको प्राइमरी इलेक्सन, लिडरशिप एकेडेमी र पोलिटिकल प्रोक्सिमिटीको विधिबाट अन्य आठ आकांक्षीलाई पछि पार्दै उम्मेदवार चयन भएका हुन् । उक्त प्रतिस्पर्धामा सुलभ खरेल (बुटवल–१६), पार्थिवेन्द्र उपाध्याय (सिद्धार्थनगर–७), ज्ञानु पौड्याल (सिद्धार्थनगर–८), जीतबहादुर गुप्ता (सिद्धार्थनगर–१), कुसुम महर्जन (मध्यपुर ठिमी–६, भक्तपुर), रचना क्षेत्री (सिद्धार्थनगर–३), पुनमकुमारी अग्रवाल (सिद्धार्थनगर–८) र मधुप्रसाद अर्याल (बुटवल–१७) आकांक्षी बनेका थिए ।
डा. थापाले नेपाली न्युरो–साइन्सको विकास, स्ट्रोक उपचार र अनुसन्धानमा करिब १६ वर्ष बिताएका छन् । पोखरास्थित मणिपाल कलेज अफ मेडिकल साइन्सेजबाट एमबीबीएस, बीपी कोइराला स्वास्थ्य विज्ञान प्रतिष्ठानबाट इन्टरनल मेडिसिनमा एमडी र चितवनको कलेज अफ मेडिकल साइन्सेजबाट डीएम न्युरोलोजी गरेका उनले अमेरिकाको हार्वर्ड विश्वविद्यालयबाट ‘सेफ्टी क्वालिटी लिडरसिप एण्ड इन्फमेटिभ’ कार्यक्रम समेत पूरा गरेका छन् । उनका ८० भन्दा बढी अनुसन्धानात्मक लेख राष्ट्रिय तथा अन्तर्राष्ट्रिय जर्नलमा प्रकाशित छन् । नेपाल स्ट्रोक एसोसिएसनका संस्थापक अध्यक्षका रूपमा उनले स्ट्रोक उपचार, निदान र सचेतनामा महत्त्वपूर्ण भूमिका खेलेका छन् । उनको नेतृत्वमा स्वास्थ्य मन्त्रालयले अनुमोदन गरेको राष्ट्रिय स्ट्रोक उपचार प्रोटोकल जारी भएको छ ।
थापाले आफ्नै पहलमा हजारौँ चिकित्सक, नर्स र स्वास्थ्यकर्मीलाई ‘स्ट्रोक मास्टर क्लास’ मार्फत तालिम दिँदै आएका छन् । काठमाडौँको व्यस्त जीवनशैलीलाई पन्छाउँदै उनले डेढ दशकदेखि हरेक हप्ता दुई दिन जन्मभूमि भैरहवा पुगेर बिरामीको उपचार गर्दै आएका छन् । उम्मेदवार घोषणा कार्यक्रममा डा. थापाले आफ्नो उम्मेदवारीलाई सामान्य निर्वाचन नभई ‘क्रान्ति’ को सुरुवातका रूपमा चित्रित गरे । “मेरो ९६ वर्षीया आमाले अझै परिवर्तनको प्रतीक्षा गर्नुभएको छ । यो चुनाव होइन, क्रान्ति हो,” उनले भने ।
थापाले पार्टीका नेता डीपी अर्याल, स्वर्णिम वाग्ले, विपिन आचार्यलगायतलाई विशेष धन्यवाद दिंदै आफूलाई राजनीतिमा होमिन प्रेरित गरेको उल्लेख गरे । “मैले आफ्ना व्यक्तिगत पेसागत अवसरलाई पछाडि पार्दै सामाजिक क्षेत्रमा योगदान गर्नुपर्ने अठोटका साथ राजनीतिमा प्रवेश गरेको हुँ,” उनले भने । थापाले रुपन्देहीका जनताले देखाएको सद्भाव र विश्वासले आफूलाई थप जिम्मेवारीबोध भएको बताए । उनले आमाबुबाप्रति कृतज्ञता प्रकट गर्दै आमाको जीवनकालमै अपेक्षित परिवर्तन ल्याउने प्रतिवद्धता व्यक्त गरे । “रुपन्देहीका जनतालाई म कहिल्यै नबिर्सनेछु । उनहरुले दिएको माया र विश्वास नै आइतबार म यो स्थानमा आइपुग्नको कारण हो,” उनले भने ।
थापाले पार्टी सभापति रवि लामिछानेको ‘यो इलेक्सन होइन, यो रिभोलुसन हो’ भन्ने भनाइ उद्धृत गर्दै अभियानलाई रुपन्देही–३ बाट परिवर्तनको मोडलका रूपमा अघि बढाउने संकल्प व्यक्त गरे । “यदि छोटो यात्रा गर्न चाहनुहुन्छ भने एक्लै जान सक्नुहुन्छ, तर टाढा जान सँगै जानुपर्छ भन्ने भावना बोकेर हामी अघि बढ्नेछौं,” उनले भने । उम्मेदवार घोषणासँगै थापाले सञ्चारकर्मी, देश–विदेशमा रहेका नेपाली डायस्पोरा र प्रत्यक्ष–अप्रत्यक्ष सहयोग गर्ने सबैलाई धन्यवाद दिएका छन् । उनले आशा गुमाएका जनतालाई फेरि आशा गर्ने आँट गर्न आग्रह गर्दै “हामी निराशा दिनेछैनौं” भन्ने वाचा गरे । रास्वपाले रुपन्देही–३ को उपनिर्वाचनलाई संगठन सुदृढ पार्ने अवसरका रूपमा लिएको छ । डा. थापाले उम्मेदवारीसँगै रुपन्देहीमा रास्वपाको उपस्थितिलाई नयाँ उचाइमा पु¥याउने विश्वास व्यक्त गरेका छन् । थापो अब रास्वपाबाट उम्मेदवारी दर्ता गराउनेछन् । उपनिर्वाचन आगामी कात्तिक १७ गते हुने छ ।