एनआरएनए कतारको विवाद अन्त्य, एकता महाधिवेशन गर्ने सहमति

काठमाडौँ(जस)–गैर आवासीय नेपाली संघ (एनआरएनए) राष्ट्रिय समन्वय परिषद् कतारको नेतृत्वमा लामो समयदेखि देखिएको विवाद अन्त्य गर्न दुुई पक्षबीच औपचारिक सहमति भएको छ । वर्तमान कार्यसमिति र सुनील घिमिरे नेतृत्वको समूहबीच एकता महाधिवेशनको माध्यमबाट संगठनलाई एक ढिक्का बनाउने सहमति जुटेको हो । दुवै पक्षले एक सहमति पत्रमा हस्ताक्षर गर्दै आगामी ११औं राष्ट्रिय महाधिवेशनलाई ‘एकता महाधिवेशन’को रूपमा सफल पार्ने प्रतिबद्धता जनाएका छन् ।
सहमति पत्रमा एनआरएनए कतारका अध्यक्ष रमेश भट्ट, प्रथम उपाध्यक्ष तथा वार्ता संयोजक कृष्ण पन्थी र युवा संयोजक टोकल लामाले हस्ताक्षर गरेका छन् । सुनील घिमिरे पक्षबाट भने आइसीसी सदस्य सुरेश भट्ट, कार्यवाहक अध्यक्ष कल्याण थापा र सदस्य वुधवल गुरुङको हस्ताक्षर रहेको छ । सहमति अनुसार, दुवै पक्षले महाधिवेशनलाई एकताको अवसर बनाउँदै आफ्नो जिम्मेवारीअनुसार काम सुरु गर्नेछन् ।
परिषद् सदस्यहरूको नामावली संकलन गर्ने उद्देश्यसहित नयाँ पोर्टल निर्माण गर्ने र यही प्रणालीमार्फत नयाँ कार्यसमिति चयन प्रक्रिया अघि बढाउने तयारी छ । त्यस्तै, सर्वोच्च अदालतको निर्देशनमा गठित उच्चस्तरीय समितिद्वारा गत मे ३ देखि ५ सम्म सम्पन्न आइसीसी एकता महाधिवेशनमा सहभागी कतारस्थित सम्पूर्ण परिषद् सदस्यहरूलाई आगामी महाधिवेशनमा अद्यावधिक गरिनेछ । दुवै पक्षले वर्तमान संक्रमणकालीन परिस्थितिलाई ध्यानमा राख्दै अन्तर्राष्ट्रिय समन्वय परिषद् (आइसीसी) मा देखिएको विवाद समाधान नहुँदासम्म सर्वोच्च अदालतको अन्तिम निर्णयको सम्मान गर्दै दुबै पक्षलाई समान व्यवहार गरिने र अदालतको निर्णयअनुसार बनेको आइसीसीसँग मात्रै आधिकारिक सम्झौता गरिने सहमति समेत जनाएका छन् ।