आइतबार, चैत्र २९ २०७७
काठमाडौं। सरकारले ठूला सहरका विद्यालय बन्द गरी अनलाइन कक्षा सञ्चालनको प्रस्ताव अघि बढाएपछि निजी तथा आवासीय विद्यालय अर्गनाइजेसन, नेपाल (प्याब्सन)ले विरोध जनाएको छ ।
कोरोना भाइरसको दोस्रो लहर रोक्न भन्दै यसअघि सरकारले ठूला सहरका विद्यालय बन्द गरी अनलाईन कक्षा सञ्चालन गर्ने प्रस्ताव अघि सारेको थियो ।
प्याब्सनले मुलुकभरका सबै विद्यालय बन्द गर्दा शैक्षिक क्षेत्रमा ठूलो असर पर्ने भन्दै त्यसको विरोध गरेको छ । पर्याप्त सावधानी अपनाएर विद्यालय सञ्चालन गर्ने र त्यसका लागि वातावरण बनाइदिन सरकारसँग माग गरेको छ ।
प्याब्सनका अध्यक्ष टीकाराम पुरी र महासचिव कुमार घिमिरेले विज्ञप्ति जारी गर्दै स्वास्थ्य सतर्कता अपनाउँदै विद्यालय नियमित रुपमा सञ्चालन हुन दिनुपर्ने बताएका हुन् ।
स्वास्थ्य तथा जनसंख्या मन्त्रालयले शनिबारको कोभिड–१९ संकट व्यवस्थापन केन्द्र बैठकमा लगेको प्रस्तावलाई सीसीएमसीले अगाडि बढाइसकेको छैन ।
शिक्षा मन्त्रालयले सरोकारवाला निकायसँग छलफल गरेर उक्त प्रस्ताव अगाडि बढाउने तयारी गरेको बताइएको छ ।
© 2026 All right reserved | Site By : sobij
