ललितपुर मेयर कप महिला टी–२० क्रिकेट च्याम्पियनसिपको उपाधि एपीएफलाई

काठमाडौं(जस)–ललितपुर मेयर कप महिला टी–२० क्रिकेट च्याम्पियनसिपको उपाधि विभागीय टिम एपीएफले जितेको छ । कीर्तिपुरस्थित त्रिभुवन विश्वविद्यालयको क्रिकेट मैदानमा शनिबार सम्पन्न फाइनल खेलमा एपीएफले सुदूरपश्चिम प्रदेशविरुद्ध आठ विकेटको जित निकालेको हो । टस जितेर ब्याटिङ राजेको सुदूरपश्चिमले पूंरा ओभर खेल्दै सात विकेटको क्षतिमा १०७ रन बनाएको थियो । १०७ रनको लक्ष्य पाएको एपीएफले दुई विकेटको क्षतिमा २३ बल बाँकी रहँदै लक्ष्य पूरा गरेको थियो ।
एपीएफको जितका लागि ओपनर ज्योति पाण्डे र कप्तान सिता राना मगरले ६९ रनको साझेदारी गरे । कप्तान मगरले २७ रन जोडिन् । त्यस्तै पाण्डेले ३६ रन बनाएकी थिइन् । दुवै खेलाडी रनआउट भएका थिए । तेस्रो नम्बरमा मैदान छिरेकी इन्दू बर्माले १९ र ममता चौधरीले १५ रन जोडिन् । त्यसअघि ब्याटिङ गरेको सुदुरपश्चिमी बिन्दू रावलले सर्वाधिक ४३ रन बनाइन् भने डली भट्टले १४ रन बनाइन् । त्यस्तै रेवती धामी, कविता कुँवरले क्रमशः १० रन र १३ रन जोड्दै बाहिरिए ।
फाइनलमा सुनिता लोहार शून्य रनमा आउट हुँदा कविता जोशी ३, ऋतु नौजिया ४, मञ्जु बोगटी ३ रनमा आउट भइन् । एक रन जोडेकी सम्झना खड्का अविजित रहिन् । एपीएफका लागि रेखा रावल, करुणा भण्डारी, सुस्मा श्रेष्ठ, सिता राना मगर र विन्दू बोहराले समान १–१ विकेट लिए । एपीएफले उपाधिसहित तीन लाख रुपैयाँ नगद रकम पुरस्कार जितेको छ भने उपविजेता सुदुरपश्चिमले एक लाख पचास हजार नगद पुरस्कार पाएको छ ।
सिता सर्वाेत्कृष्ट खेलाडी
ललितपुर मेयर कप महिला टी २० क्रिकेट प्रतियोगिताको उत्कृष्ट खेलाडी एपीएफकी कप्तान सिता रानामगर बनेकी छिन । प्रतियोगितामा उत्कृष्ट बलर एपीएफकी विनु बुढा मगर बनिन । उनले प्रतियोगितामा पाँच खेलमा १० विकेट लिइन । जसमा उनले ६६ रन खर्चिएकी थिइन । उनको प्रतियोगितामा उत्कृष्ट बलिङ ११ रन खर्चिएर चार विकेट थियो । यस्तै प्रतियोगिताको उत्कृष्ट ब्याटर प्रदेश एककी कप्तान रुविना क्षेत्री बनिन् । उनले प्रतियोगितामा चार खेलमा एक सय ६१ रन बनाएकी थिइन । जसमा उनको उच्च स्कोर ६८ रन थियो भने एउटा अर्धशतक बनाएकी थिइन । उनको टिम भने लिग चरणबाट बाहिरीएको थियो ।
विना र रुविनाले जनही १५–१५ हजार रुपैयाँ पाए । प्रतियोगिताको उत्कृष्ट खेलाडीको पुरस्कार एपीएफकी कप्तान सिता रानामगरले पाइन । टिमलाई उपाधि दिलाउन राम्रो कप्तानी गरेकी उनले ब्याटिङ र बलिङ दुबैमा राम्रो खेलेकी थिइन । जसमा उनले ब्याटिङमा पाँच खेलमा एक सय २३ रन बनाइन । जसमा उनले एक अर्धशतक हिर्काएकी थिइन । उनको उच्च स्कोर ५२ रन रहेको थियो । बलिङमा पनि उनले पाँच विकेट लिएकी थिइन ।