च्याम्पियन्स लिग: क्वाटरफाइनलको पहिलो लेगमा सिटीद्वारा डर्टमुन्ड पराजित, लिभरपुलमाथि रियल मड्रिडको सहज जीत

काठमाडौं। युरोपियन च्याम्पियन्स लिग फुटबलअन्तर्गत गएराति भएको क्वाटरफाइनलको पहिलो लेगमा इंग्लिस क्लब म्यानचेस्टर सिटी विजयी भएको छ । घरेलु मैदानमा भएको खेलमा सिटीले जर्मन क्लब बोरूसिया डर्टमुन्डलाई २-१ ले हराएको हो ।

सिटीको जीतमा केभिन डि ब्रुयना र फिल फोडेनले १-१ गोल गरेका थिए भने डर्टमुन्डका मार्को रिउसले १ गोल फर्काए ।

खेलको १९औं मिनेटमा रियाद माहरेजको पासमा डिब्रुयनाले गोल गर्दै सिटीलाई अग्रता दिलाएपछि पहिलो हाफमा १-० को अग्रता लिएको थियो ।

दोस्रो हाफको अन्त्यतिर ८४औं मिनेटमा रिउसले गोल फर्काएपछि खेल बराबरीमा आएको थियो । तर ९०औं मिनेटमा फोडेनले गोल गर्दै सिटीलाई जीत दिलाए ।

लिभरपुलमाथि रियल मड्रिडको सहज जीत

युरोपियन च्याम्पियन्स लिग फुटबलअन्तर्गत गएराति भएको खेलमा स्पेनिस क्लब रियल मड्रिडले सहज जीत निकालेको छ । क्वाटरफाइनलको पहिलो लेगमा रियलले इंग्लिस क्लब लिभरपुललाई ३-१ ले हराएको हो ।

रियलको जीतमा भिनिसियस जुनियरले २ गोल गरे भने मार्को एसेन्सियोले १ गोल गरे । लिभरपुलका मोहमद सालाहले एक गोल फर्काए ।

खेलको २७औं मिनेटमा भिनिसियसले गोल गर्दै टोलीलाई अग्रता दिलाएका थिए । ३६औं मिनेटमा एसेन्सियोले रियलको अग्रता दोब्बर पारेपछि पहिलो हाफ २-० मा सकिएको थियो ।

५१औं मिनेटमा सालाहले गोल गर्दै लिभरपुललाई खेलमा फर्काउने प्रयास गरे । ६५औं मिनेटमा भिनिसियसले अर्को गोल थपेपछि रियल ३-१ ले अघि बढ्यो । त्यसपछि लिभरपुल खेलमा फर्कन सकेन र हार व्यहोर्न बाध्य भयो ।

सेमिफाइनल पुग्न अब लिभरपुलले दोस्रो लेगमा घरेलु मैदानमा २-० वा त्योभन्दा बढी अन्तरले खेल जित्नुपर्ने हुन्छ ।