एनआरएनमा थप योगदानका लागि जिम्मेवार पदमा रहेर काम गर्ने चाहना छ

लोक प्रसाद दाहाल
अध्यक्ष, गैरआवासीय नेपाली संघ
(एनआरएनए) एनसीसी बेल्जियम
एनआरएनए आइसिसीका लागि सह–कोषाध्यक्ष पदका उम्मेदवार

एनआरएनए अभियानमा लामो समयदेखि सक्रिय लोकप्रसाद दाहाल हाल एनआरएनए एनसीसी बेल्जियमको अध्यक्ष हुनुहुन्छ । लामो समयदेखि स्थायीरुपमा बेल्जियम बस्दै आउनुभएका दाहालले एनसीसी बेल्जियमको महासचिवको जिम्मेवारी पनि सफलतापूर्वक निर्वाह गरिसक्नुभएको छ । नेपालमा बुढाथुम धादिङमा उहाँको घर छ । हाल बेल्जियममा व्यवसायसँगै सामाजिक कार्यमा पनि सक्रिय रहँदै आउनुभएका दाहालले एनआरएनए आइसीसीको सन् २०१९–२०२१ कार्यकालका लागि केन्द्रीय नेतृत्वका लागि आफ्नो उम्मेदवारी घोषणा गर्नुभएको छ । केही दिनअघि एनआरएनए ओमानको महाधिवेशनमा एनआरएनए आइसिसीमा सहकोषाध्यक्ष पदमा आफ्नो उम्मेदवारी घोषणा गर्नुभएका दाहालसँग एनआरएनए अभियान, आगामी नेतृत्व र समग्र एनआरएन अभियानमा केन्द्रित रहेर जनसवाल दैनिकका लागि रामजी बगालेले गरेको कुराकानीको सारसंक्षेप :

बेल्जियममा के सिलसिलामा आउनु भयो ? बेल्जियमको बसाई कस्तो रहेको छ ?
मैले सुरुमा प्राथमिक शिक्षा भारतमा पढे । किनभने बुबा उता हुनुहुन्थ्यो । त्यसपछि माध्यमिक शिक्षा भने मैले गाउँकै बुद्धिविशाल माध्यमिक विद्यालयमा एसएलसी सकेपछि गाउँ छाडेर काठमाडौँतिर आए । पछि पुनः उच्चशिक्षाको लागि भारत गए । भारतबाट अध्ययनकै सिलसिलामा सिङ्गापुर पुगे । सिङ्गापुरमा १९९७ मा ट्राभल्स एन्ड टुरिजम पढाइ सकेर रोजगारीकै सिलसिलामा म १९९९ बेल्जियम आए । बेल्जियम आएर लामो समय होटेल तथा रेस्टुरेन्ट एवं हस्पिटालिटी क्षेत्रमा काम गरेर कार्य अनुभव बनाए । मेरो बेल्जियम बसाई एकदमै सङ्घर्षपूर्ण नै रहिरहेको छ । काममा, व्यवसायमा, सामाजिक कार्यमा निरन्तर लागिरहनाले बेल्जियममै सुन्दर भविष्य निर्माण गर्न सफल भए । अहिले एकदमै सुखद र सन्तुष्टपूर्ण नै रहेको छ बेज्लियम बसाई । किनभने, बेल्जियममा धेरै वर्ष काम गरेपछि व्यवसाय गर्ने सोच भएपछि व्यवसायमा लागे । सन् २००४ मा बेल्जियमको परमानेन्ट रेसिडेन्सी पनि पाए । त्यसपछि, सम्पूर्णरुपमा बेज्लियम नै मेरो कर्मभूमि भयो ।

बेल्जियममा के–कस्ता व्यावसायहरु गरिरहनुभएको छ ?
म यहाँ धेरै व्यवसायमा आबद्ध छु । मेरो व्यवसायको प्रमुख क्षेत्र भनेको होटेल तथा रेस्टुरेन्ट नै हो । तर, होटेल तथा रेस्टुरेन्टसँगै अन्य धेरै व्यवसायहरू पनि सञ्चालन गरिरहेका छौ । म अहिले विशेष गरी, एउटा थ्री स्टार होटेल नेशनल आन्तोरपिङ, सात वटा सुसी रेस्टुरेन्ट, सहकारी संस्था, हाउजिङ, एसियन सुपरमार्केट, घरनिर्माण कार्य आदि जस्ता विभिन्न व्यवसायमा आबद्ध रहेको छु ।

तपाईँ व्यवसायबाहेक सामाजिक संस्थाहरूमा पनि उत्तिकै क्रियाशील हुनुहुन्छ, कसरी लाग्नुभयो सामाजिक सेवामा ?
मेरो पहिलो प्राथमिक कार्य भनेको व्यवसायभएता पनि वर्षौदेखि म विभिन्न सामाजिक कार्यहरूमा, सामाजिक अभियानहरूमा, सामाजिक सङ्घसंस्थाहरूमा पनि निरन्तर सक्रियरुपमा सहभागी हुँदै आएको छु । खास गरि मेरो सामाजिक कार्यको मूल घर भनेको एनआरएनए नै हो । म एनआरएनएमा सन् २००३ देखि निरन्तर सक्रियमारुपमा आबद्ध छु । म हाल एनआरएनए बेल्जियमको अध्यक्ष पदमा छु । साथै, सामाजिक संस्था वर्क फर फाउन्डेसनको सल्लाहकार, फ्रम पिपल टु पिपल बेल्जियमको सदस्य छु, व्यवसायी सङ्घ बेल्जियमको अध्यक्ष छु । यी र यस्ता सङ्घसंस्थाहरूमार्फत निरन्तर आफ्नो सामाजिक जिम्मेवारिता निर्वाह गर्दै आइरहेको छु ।

एनआरएनलाई त धनीहरूको मात्र संस्था भन्ने गरिन्छ नि ?
एनआरएन धनी जन्माउने संस्था चैँ हो । तर, धनीहरूको मात्र संस्था हैन । एनआरएन त संसारभर छरिएर रहेका सारा नेपालीहरूको छाता सङ्गठन हो । यसले विश्वमा रहेका सबै नेपालीबीचमा भाइचाराको सम्बन्ध बढाइरहेको छ । एनआरएनए विदेशमा रहेका नेपालीहरूका नेपाल सरकारको मान्यता प्राप्त एक मात्र विशाल सङ्गठन हो । यो संस्थाका प्रत्येक सदस्यले तिरेको लेवीले चल्ने संस्था हो । केही व्यक्तिहरू धनाढ्य भएता पनि संस्था ती धनाढ्यहरूको मात्र हैन । संस्था सारा परदेशी नेपालीहरूको हो । यस्तो पवित्र संस्थालाई लगाएको त्यस्तो आरोपलाई म कसैगरी स्वीकार गर्न सक्दिन ।

एनआरएनमा रहेर के कति काम गर्नुभयो ? के कस्तो अनुभव भइरहेको छ ?
म एनआरएनमा लाग्नुको उद्देश्य भनेकै नेपालको समृद्धिमा आफुले सकेको योगदान पुराउन सकौं भन्ने नै हो । सामाजिक तवरबाट धेरै कामहरू पनि गरिसकेका छौँ । अहिले हामी नेपालको पर्यटन र संस्कृति प्रवद्र्धन गर्ने अभियानमा छौ । नेपालको हरेक समस्यामा एनआरएनएले सकेको सहयोग गरिनैरहेको छ । नेपालमा विपत्ती पर्दा सहयोग गरिरहेका छौ । चाहे सानो सहयोग होस वा ठूलो सहयोग होस तर, सहयोग भनेको सहयोग नै हो । जिम्मेवारीपूर्वक एनआरएनले नेपालमा सकेको सहयोग गर्दै आइरहेको छ । किनभने, एआरएनको प्रमुख उद्देश्य भनेकै जन्मभूमिप्रति आफ्नो कर्तव्य निर्वाह गरौँ भन्ने हो । अहिले हामीले जाजरकोटमा एउटा सुविधा सम्पन्न सभाकक्ष जस्तो प्रविधिमैत्री बिल्डिङ बनाउँदै छौ । मलाई यस्ता सामाजिक कार्यमा लागेर बहुत खुसी मिलिरहेको छ । जुन खुसी मैले व्यवसाय मात्र गरेको भए सायद पाउन सक्ने थिइन । म अहिले बहुत सन्तुष्ट छु । ममा भूकम्पपछि झनै समाजप्रतिको धारणा परिवर्तन भयो । समाजप्रतिको जिम्मेवरिताको जागृति झन् बोध भयो । जसले गर्दा, मलाइ यो अभियानमा लागिरहन थप उत्साह र प्रेरणा मिलेको छ । समाजमा हामीले अझौं धेरै योगदान गर्नुपर्ने छ । जसकोलागि थप सक्रिय र प्रतिबद्ध भएर निरन्तर सामाजिक कार्यमा आफूलाई समर्पित गरिरहन प्रतिबद्ध छु ।

आफ्नो गाँउठाँउतिर के कस्ता सामाजिक कार्यहरू गर्नुभएको छ तपाईँले ?
मैले आफ्नो जन्भभूमिमा पनि केहीहदसम्म सामाजिक कामहरू गरेको छु । आफ्नो जन्मभूमिको लागि भूकम्पपश्चात् २७ जना विशिष्ट डक्टरहरूको समूह लगेर उपचार गर्न मद्दत गरे भने भूकम्पको बेलामा गोरखा र धादिङमा खाद्यान्न प्रदान, गाउँको आफूले पढेको स्कुल निर्माण, मन्दिर निर्माण, खानेपानी निर्माण जस्ता अन्य विविध कार्यहरूसमेत गरेको छु । अझै यस्ता धेरै कामहरू गर्नुपर्ने छ । यी त भए सामाजिक कामहरू । साथै व्यावसायिक रूपमा पनि मैले आफ्नो देशमा धेरै भन्दा धेरै लगानी भित्राउन पहल गरिरहेको छु । नेपालका विभिन्न हाइड्रोमा लगानी गर्दै छु । युरोपमा भन्दा नेपालमा लगानी बढाउँदै छु । नेपालमा बेल्जियमको बियर लैजाँदै छु ।

यहाँ लामो अवधि युरोपमा रमाउनु भयो ? युरोपमा के–कस्ता समस्याहरू छन् नेपालीहरुकोलागि ?
युरोपमा खासमा कुनै त्यस्तो समस्या छैन । किनभने यहाँ हरेक समस्याको तत्कालीन समाधान हुन्छ । यहाँ सिस्टमले तत्कालै हरेक समस्याको समाधान गरिहाल्छ । तर, दुःखद कुरा के मात्र हो भने– नेपालबाट युरोप के के नै हो भनेर आउनुहुन्छ तर सोचेको जस्तो हुँदैन, त्यसले गर्दा नेपालीहरू आफ्नै मनोगत समस्यामा फस्छन । तर, अहिले पछिल्लो समयमा प्रोचुगल, पोल्यान्ड, चेक जस्ता देशहरूमा भने केही समस्याहरू देखापर्न थालेका छन् । नेपालीहरू अलपत्र परेका भन्ने सुनिन्छ । यस्ता समस्याहरूलाई नेपाल सरकारले नै राम्रो अनुगमन गर्नुपर्दछ । पहिला पहिला आउनेहरूका लागि युरोपमा राम्रो सम्भावना र अवसरहरू थियो तर अहिले युरोप आउनेलाई सोचेजस्तो त्यति राम्रो छैन । त्यसर्थ, यहाँ आउँदा बुझेर मात्रै आउनु होला ।

तपाईँको यत्रो भव्य सफलताको गोप्यसुत्र के हो ?
हाहाहा । खासमा हरेक सफलताको कुनै त्यस्तो गोप्यसुत्र भन्ने हुन्छ जस्तो लाग्दैन । यद्यपि, यदि त्यस्तो कुनै सूत्र हुन्छ भने त्यो हो– लगनशीलता, इमानदारीता, अनुशासन, क्रियाशीलता र धैर्यता नै हो । र, मेरो सफलताको अर्को महत्पूर्ण पक्ष भनेको मेरो परिवारको सहयोग र समर्थन हो । म युरोप छिरेको आफ्नै दुःखले हो । र, आफ्नै दुःख, सङ्घर्ष र श्रीमती एवं परिवारको साथले जीवनमा खुसी, सन्तुष्टि, सफलता मिलिरहेको छ ।

युरोपको विकासको रहस्य के रहेछ ?
युरोपको विकासको मुख्य कारण कानुनको पूर्ण पालना नै हो । यहाँ सुन्दर व्यवस्था छ । नेपालमा जस्तो हरेक काममा झन्झट बेहोर्नुपर्दैन । नेपालमा जताततै झन्झटिलो प्रक्रिया भएकोले समस्या भईरहेको छ । नेपालमा लगानीको सुरक्षा वा ग्यारेन्टी पनि छैन । युरोपमा भने हर लगानीको ग्यारेन्टी हुन्छ । व्यवसाय गर्न धेरै सहज र सरल प्रक्रिया हुन्छ यहाँ युरोपमा । बेल्जियममा धेरै नेपाली व्यापारी छन् । नेपालमा पनि कानुनको पालना भएमा विश्वभरबाट हजारौँ विदेशी नेपालीहरू लगानी गर्न रातारात आउन तम्तयार भएर बसेको मैले पाएको छु ।

एनआरएनमा अब कसरी अगाडि बढ्दै हुनुहुन्छ ?
हो एनआरएन अभियानमा म अझ सशक्तरुपमा अगाडि बढ्न चाहन्छु । समाजमा योगदान गर्नको लागि जिम्मेवार पदमा रहनु पनि महत्वपूर्ण रहेछ । यसर्थ आगामी केन्द्रीय अधिवेशनमा अझ जिम्मेवार पदमा रहेर काम गर्ने मनसाय अनुसार निरन्तर एनआरएन अभियानमा सक्रिय रुपमा सहभागी हुँदै आएको छु । प्राय सबै एनआरएनए अभियान वा कन्फेरेन्समा उपस्थित हुने गरेको छु । मैले आईसीसी २०१९–२०२१ को लागि सहकोषाध्यक्ष पदमा उम्मेदवारी घोषणा पनि गरिसकेको छु । सबै साथीहरूको साथ, विश्वास र समर्थन पाएमा मेरो उम्मेदवारिता सफल हुन सक्छ । मलाई विश्वास छ, मित्रहरूले मलाइ विश्वास गर्नेछन । साथीहरूले मलाइ विश्वास गर्नुभयो भने म यहाँहरूको विश्वासलाई कसैगरी तोडने छैन भन्ने प्रतिबद्धता समेत गर्न चाहन्छु ।

उम्मेदवारी घोषणा गरिसकेको सन्दर्भमा के भन्न चाहनुहुन्छ ?
म यो अभियानमा सधैँ हातमा हात र साथमा साथ मिलाएर अगाडि बढिनै रहने छु । मैले एनआरएनए आईसीसी २०१९–२०२१ को लागि सहकोषाध्यक्ष पदमा उम्मेदवारी घोषणा गरिसकेको छु । यहाँहरूले मलाइ साथ र सहयोग गर्नुहुनेछ भन्ने पूर्ण विश्वास छ । म एनआरएनए अभियानमा पदमा रहे पनि वा नरहे पनि निरन्तर मन, वचन र कर्मले लागि नै रहने छु । मैले बुझे अनुसार पद केही पनि हैन बरु सक्रिय सहभागिता र काम नै सबैथोक हो । म सम्पूर्ण एनआरएन साथीहरूलाई यो सबैको साझा संस्था भएकोले सहकार्य गरेर अगाडि बढ्नको निमित्त हार्दिक अपिलसमेत गर्न चाहन्छु । ८० वटै देशका सबै साथीहरूलाई सहकार्य र सहयोगको लागि अपिल गर्दछु ।