एनआरएनए ओसेनिया क्षेत्रीय सम्मेलन सिडनीमा शनिबारदेखि हुँदै, सम्मेलनको सम्पूर्ण तयारी पूरा

सिड्नी (जस)–गैरआवासीय नेपाली संघ (एनआरएन) तेस्रो ओसेनिया क्षेत्रीय सम्मेलन यही शनिवारदेखि अष्ट्रेलियाको सिडनीमा आयोजना हुने भएको छ । ‘इन्भेष्मेन्ट, इन्नोभेसन र टुरिजम’ मूल नारा राखिएको सम्मेलन यही आउँदो मे ११ र १२ मा हायात रेजेन्सी, डार्लिङ हार्बर सिडनी, अष्ट्रेलियामा हुने गैर आवासीय नेपाली संघ अन्तर्रा्ष्ट्रिय समन्वय परिषद्का ओसेनिया संयोजक धर्मराज अधिकारीले बताए । ‘म एनआरएनए अष्टे«लिया महादेश संयोजकको हैसियतले यस्तो महत्वपूर्ण भेलाको खबर दिन पाउँदा अत्यन्तै खुसी छु । ओसिनिया क्षेत्रीय सम्मेलन भन्नाले नै यो ओसिनिया क्षेत्रको सम्मेलन हो र यो सम्मेलनमा यो क्षेत्रको बारेमा चर्चा र विशेष छलफल हुनेछ,’ अधिकारीले भने ।
सम्मेलनमा एनआरएनएका विशिष्ट पदाधिकारी तथा नेपाल सरकारका कानून मन्त्री भानुभक्त ढकाल, अस्ट्रेलियाका अध्यागमन मन्त्री डेबिड कोल्म्यान तथा व्यवसायीहरुको सहभागिता हुने संयोजक धर्मराज अधिकारीले बताए । एनआरएनका अध्यक्ष भवन भट्ट, उपाध्यक्ष कुमार पन्त र कुल आचार्य, महासचिव बद्री केसीलगायत सम्मेलनमा आउने निश्चित भइसकेको पनि अधिकारीले बताए । सम्मेलनमा विभिन्न बुद्धिजीबीहरुले कार्यपत्रहरु पेश गर्ने र त्यसमाथि ब्यापक बौद्धिक तथा व्यवहारिक बहस हुने आयोजकले बताए । सम्मेलनमा क्यानाडाबाट डा प्रमोद ढकाल, अमेरिकाबाट डा अम्बिका अधिकारी, अस्ट्रेलियामा क्रियाशील डा राजु अधिकारी, डा कुश श्रेष्ठ, डा कृष्ण हमाललगायतले विभिन्न बिषयमा कार्यपत्र पेश गर्ने र सम्मेलनका निष्कर्षहरू नेपालका लागि निकै उपयोगी हुने संयोजक अधिकारीले बताए ।

नेपालमा अहिले स्थिर सरकार भएकाले विकासका निम्ति उपयुक्त बाताबरण बनेको र अब प्रवासी नेपालीहरुले योगदान गर्न सक्नेबारे सम्मेलनमा ब्यापक छलफल हुने उनले बताए । ‘सम्मेलनमा गैरआवासीय नेपालीहरुका इस्युबारे पनि छलफल हुनेछ जसमा संस्थागत शुद्धीकरण र नेपालमा भएको लगानी सुरक्षण मुख्य बिषय छन्’ संयोजक अधिकारीले भने । सम्मेलनमा न्युजिल्याण्ड, भानुवाटुलगायतका देशबाट पनि प्रतिनिधि आउने छन् । अस्ट्रेलियालगायत न्युजिल्याण्ड, पपुवान्युगिनी, भानुवाटु लगायत देशमा एनआरएनका संगठन बनेका छन्, जसको नेतृत्व ओसेनिया क्षेत्रीय समितिले गर्छ ।

सम्मेलनबाट एनआरएन अन्तर्राष्ट्रिय समितिको चुनावी चहलपहल बढ्ने तथा नेपालले अस्ट्रेलियामा एकपटक फेरि नेपालमा प्रबासीहरुलाई लगानी गर्न आकर्षित गर्न सक्ने बताइएको छ । सम्मेलन नेपाल सरकार र यहाँ स्थित निकायहरुले नेपाल प्रबर्धन गर्ने यो अर्को अवसर हुनेछ ओसिनिया क्षेत्रीय सम्मेलनमा यो क्षेत्रका उपलब्धि, अवसर, समस्या र आगामी दिनकालागि योजना कार्ययोजनाबारे विशेष चर्चा र छलफल गर्ने अधिकारीले बताए । ‘ओसिनिया क्षेत्रीय सम्मेलनको मुख्य उद्देश्य भनेको नेपाललाई समृद्ध बनाउन कसरी एनआरएनएले बढीभन्दा बढी लगानी, आविष्कार र पर्यटक भित्र्याउन सकिन्छ भनेर विशेष छलफल गर्ने हो । अर्थात, काम गर्ने सिलसिलामा विदेशिएका नेपालीहरूले विदेशमा सिकेको ज्ञान, सिप, क्षमता, अनुभव, शिक्षा र कमाई लाई कसरी नेपालमा बृहत्तरुपमा लैजाने भन्नेबारे वृहत् बहस र विमर्श सम्मेलनमा हुनेछ । समग्रमा, नेपालको समृद्धिमा कसरी हातेमालो गर्ने भन्ने बारे नै बृहत् छलफल हुने हो । त्यसर्थ, हाम्रो भेलाको मूल नारा नै ‘सधैँ सबैको लागि र समृद्ध नेपालकालागि गैरआवासीय नेपाली’ भन्ने छ । साथै, सम्मेलनमा नयाँ कार्यसमिति चयनलगायतका विषयहरु पनि छन्’ अधिकारीले भने ।