अमेरिकामा पनि सञ्चार क्षेत्रमै निरन्तर काम गरिरहेकी छु

अनिता सिलवाल
मिडियाकर्मी, नर्थ क्यारोलाइना अमेरिका

अनिता सिलवाल नेपाली मिडिया क्षेत्रमा नौलो होइन । चार वर्षको उमेरमा कलाकारिता क्षेत्र हुदैं न्यूज २४ टेलिभिजनबाट पत्रकारिता थालेकी सिलवाल समाचारवाचिका र कार्यक्रम प्रस्तोताका रुपमा चिनिन्छिन् । समाचारवाचन र उनको कार्यक्रम प्रस्तुतीकरण शैलीलाई धेरैले मनपराए । गत डिसेम्बर २०१८मा अमेरिकाको नर्थ क्यारोलाइनामा आयोजित ग्लोबल फिल्म, म्यूजिक, र मिडिया अवार्डमा सिलवालले उत्कृष्ठ उद्घोषिकाको अवार्डसमेत जितेकी थिइन् ।
सानो उमेरबाट टेलिभिजनको पर्दामा कलाकारिता, ग्लामरको दुनियाँ हुदैं समाचारवाचिका, कार्यक्रम प्रस्तोता र निर्माताका रुपमा स्थापित नाम हो अनिता सिलवाल । करिब एक दशक भन्दा लामो समय चलचित्र र टेलिभिजनको पर्दामा बिताएकी सिलवाल अहिले अमेरिकालाई आफ्नोे कर्मथलो बनाउदैं आइरहेकी छिन् । डाटा एनालेक्टिस्मा स्नातकोत्तरको पढाई सक्नै लागेकि सिलवाल डाटा जर्नालिजमको भविष्य राम्रो भएको बताउँछिन् । अमेरिकामा रहेर अध्ययन सँगसँगै उनले कार्यक्रम प्रस्तोताका रुपमा पनि कार्य गरिरहेकी छिन् । लगनशीलता र समय व्यवस्थापनलाई पहिचान बनाएर कार्य गरिरहेकी सिलवालले अमेरिकामा पनि कार्यक्रम प्रस्तोताको कार्यलाई निरन्तरता दिइरहेकी छिन् । हाल अमेरिकामा रहेर पनि उनले आफ्नो पत्रकारिता र उद्घोषणको यात्रालाई जारी राखेकी छिन् । यसै विषयमा सिलवालसँग गरिएको कुराकानी :
:

अमेरिकामा रहेर पनि आफ्नो कार्यलाई कसरी जारी राख्नुभएको छ ?
अहिले म यहाँ एक पत्रिकाका निम्ति कार्यक्रम सञ्चालकका रुपमा आबद्ध छु । केही समय अगाडि मात्रै चर्चित अमेरिकी मूर्तिकार फ्रोस्टी माएरस्, प्रसिद्ध रेस कार ड्राइभर हर्लि हेवुड, निर्मात्री डेब्बी माएरस्सँग अन्र्तवार्ता गरें । विभिन्न कार्यक्रमहरु सञ्चालनका साथै म ‘होमटाउन सिरोज’ भन्ने कार्यक्रम निर्माणमा लागिरहेकी छु ।

कस्तो कार्यक्रम हो यो र कहाँ प्रशारण हुन्छ ?
यो कार्यक्रम महिला वर्गलाई लक्षित गरेर निर्माण गरिएको छ । धेरै जसो बालबालिकाले प्रायजसो समाजमा नाम चलेको पात्रलाई आफ्नो रोल मोडल बनाउँछन् र त्यो व्यक्तिलाई भेट्न पाए कत्ति कुरा सिक्थें भन्ने सोचिरहेका हुन्छन् । यर्थाथता हेर्ने हो भने हाम्रै समाजमा कैयौं प्रेरणादायी जीवनहरु छन्, जसको भोगाई नयाँ पिढीका लागी हौसला बन्न सक्छ । यो कार्यक्रम हाल मूलतः अंग्रेजी भाषाको भएपनि केही भागहरु नेपाली महिलाहरुको कथा पनि समेटिएको छ । प्रशारण यही अवस्थित एक च्यानलसँग र नेपालमा केही संस्थाहरुसँग कुरा भइरहेको छ ।

विषेशगरि समाचार र राजनीतिक विषयवस्तुमा तपाईका कार्यक्रम केन्द्रित हुन्थे, के त्यस क्षेत्रमा रुचि घटेको हो?
म राजनीतिमा सानैदेखि चाख लिने मान्छे । नौ वर्षको उमेरमा तत्कालिन प्रधानमन्त्री गिरिजाप्रसाद कोइरालासँगको केही भेटपछि ममा राजनीति प्रति चासो बढेको हो । अहिले पनि म विश्व घटना लगायत देशमा भइरहेका हरेक गतिविधिका बारे सचेत छु । न्यूज २४ मा पनि महिलाका विषयहरु जस्तै शारिरिक अधिकार, कन्या भू्रण हत्या, महिला माथिका हिसाँ आदि विषयमा कैंयन पटक प्रस्तुत गरेकी छु । विश्वमा महिलाहरुलाई प्रेरित गराउने उद्धेश्यले मात्र महिलाका विषयका कार्यक्रम ल्याएकी हुँ ।

महिलाका विषय मात्र उठाउदा समाजको अर्को वर्गमा नकारात्मक छाप पर्दैन ?
त्यसो भन्न मिल्दैन । महिलाका विषय उठाउदा पुरुषहरुले हाम्रो विषयमा पनि कुरा उठ्नुपर्छ भनिरहेका हुन्छन् । विषेशगरि इतिहास हेर्दा हाम्रो समाज धेरै लामो समय पुरुषप्रधान रह्यो । अहिले समानताका लागी महिलाहरु मेहेनत गर्दैछन्, त्यत्ति नै हो, यसमा नकारात्मक त केही छैन नि । मेरो विचारमा एक महिला सफल हुदाँ पुरुष र पुरुष सफल हुदाँ महिला पनि सफल हुन्छन् । हामी मिडियाकर्मीहरुले पनि सकारात्मक रुपले महिला पुरुषका समानताका विषयलाई जोड दिनुपर्छ ।

अमेरिकामा पनि यसै क्षेत्रमा लागेर काम गर्न कत्तिको सहज वा कठिन छ?
कुनै पनि काम सहज र कठिन त हुदैंन । निरन्तरको प्रयासले नै सिकिने हो । यहाँ चाहीँ मिडियामा धेरै कम्पिटिसन छ, चुनौती नि छन् र बलियो भविष्य पनि छ । नेटवर्किगंको पनि ठूलो महत्व छ । तपाईको संगतले पनि तपाईले गर्ने काममा असर गर्छ । मैले कठिनाई खासै भोगेको छैन, तर पनि मेहेनतन नगरे त सफल हुन सकिदैन नि । कामप्रति पूर्ण जिम्मेवारी लिने बानीले पनि मलाई हरेक काम सहज प्राय नै लाग्छ ।

नेपालमा तपाईको वाचन र प्रस्तुतिलाई लिएर हौसला र प्रेरणा लिनेलाई केही सन्देश?
सबैभन्दा पहिले जस्तोसुकै परिस्थितीमा पनि आत्मसम्मान र आत्मविश्वासलाई सदैब दृढ राख्नुस् । आफ्नो कामप्रति जिम्मेवार रहन सक्नुभयो भने स्वतन्त्रताको महसुस हुन्छ । गलत विषय छ भने आवाज उठाउनुस्, तपाईको आवाजले कसैको जीवन बदलन सक्छ । निरन्तरको प्रयास र सिक्ने प्रवृत्तिले तपाईमा निखारता ल्याउछ ।