काठमाडौँ,गैरआवासीय नेपाली संघ एनआरएनएका कोषाध्यक्ष सुनील साहले सरकारले गरेको नागरिकता विधेयक प्रमाणीकरणको स्वागत गरेका छन । लामो समयदेखि अड्किएको नागरिकता विधेयकलाई राष्ट्रपति रामचन्द्र पौडेलले बुधबार प्रमाणीकरण गरेकोमा गैरआवासीय नेपालीहरू अत्यन्तै खुशी भएको साहले बताए । केही दिनको युरोप भर्मणमा निस्केका कोषाध्यक्ष साहले एनआरएनए एनसिसि इटालीले गरेको स्वागत कार्यक्रममा बोल्दै विधेयक प्रमाणीकरणले गैरआवासीय नेपालीलाई नागरिकता लिन बाटो खुलेको बताए । यसबाट गैर आवासीय नेपालीहरुले अब राजनीतिक र प्रशासनिक बाहेकका सबै अधिकार प्रयोग गर्न पाउने गरी नागरिकता पाउने साहले दावी गरे । वंशज वा जन्मको आधारमा स्वयंले वा बाबु वा आमा, बाजे वा बज्यै नेपालको नागरिकता लिई पछि विदेशी मुलुकको नागरिकता लिएको गैरआवासीयले यस्तो व्यवस्था बमोजिम नागरिकता पाउनेछन । एनआरएनए कोशाध्यक्ष साहले विधेयक प्रमाणीकरणको स्वागत गर्दै यसबाट आफूहरूको अभियानले सार्थकता पाएको बताए । उनले एक पटकको नेपाली, सधैँको नेपाली भन्ने एनआरएनएको अभियानले सार्थकता पाएको बताउदै आफूलाई स्वागत गरेकोमा एनआरएनए इटालीलाई धन्यवाद ब्यक्त गरे । उक्त स्वागत तथा अन्तर्कृया कार्यक्रममा एनआरएनए इटालीका अध्यक्ष छबी लाल कँडेल,भावेश सिंहलगाएतको उपस्थिति रहेको थियो । उक्त कार्यक्रममा गैर आवासीय नेपालीका विविध बिषयमा छलफल भएको थियो । केही दिनको युरोप भर्मणमा निस्केका कोषाध्यक्ष साहले माल्टा,साईप्रसलगाएतका देशहरुमा पुगी तेहा रहेका गैर आवासीय नेपालीहरुसँग अन्तर्कृया कार्यक्रम गर्ने कार्यक्रम रहेको बताए ।