बेलायतमा कोरोनाको संक्रमणबाट अर्का नेपालीको मृत्यु भएको पुष्टि

लन्डन । विश्वभर महामारीको रुपमा फैलिएको कोरोना भाइरस (कोभिड-१९) का कारण बेलायतमा अर्का एकजना नेपालीको मृत्यु भएको अस्पतालले पुष्टि गरेको छ ।

साउथ इस्ट लण्डनमा बस्दै आएका ४० वर्षीय प्रशान्त अर्यालको गत सोमबार निधन भएको थियो । कोरोना संक्रमणका कारण निधन भएको कुरा अस्पतालले मृतकका परिवारलाई जानकारी गराएको हो ।

सामान्य ज्वरो तथा खोकीको समस्या भएका अर्याललाई गत शनिबार अकस्मात चक्कर लागेपछि स्थानीय क्वीन एलिजाबेथ अस्पतालमा लागिएको थियो ।

उपचारकै क्रममा उनको निधन भएको थियो । ब्लड प्रेसर बाहेक अन्य कुनै रोग नरहेको पारिवारिक स्रोतले बताएको छ । बेलायतमा एकाउन्टिङ फर्ममा कार्यरत अर्यालका श्रीमती सहित एक छोरा र एक छोरी रहेका छन् ।
उनको पुर्ख्यौली घर चितवन रहेका मृतक अर्यालको परिवार अहिले घरमै आइसोलेसनमा रहेका छन् ।

कोरोनाकै कारण लण्डनस्थित साउथ ह्यारोमा बस्दै आएका संखुवासभा खाँदबारी निवासी ६६ वर्षीय भूतपूर्व गोर्खा सैनिक लिलाबहादुर राईको निधन भैसकेको छ ।

हालसम्म बेलायतमा कोरोना भाइरसको संक्रमणबाट दुईजना नेपालीको मृत्यु भैसकेको छ । यसैगरी कोरोना भाइरसबाट संक्रमण भएकी भगवती रानाभाट भने उपचारपछि अस्पतालबाट डिस्चार्ज भएर घर फर्किसकेकी छन् ।
विश्वभरी कोरोनाबात मृत्यु हुनेको संख्या २२ हजार नाघिसकेको छ भने बेलायतमा यस रोगको संक्रमणबाट मृत्यु हुनेको संख्या ४ सय ६५ पुगेको छ ।